पॉवर बँकचा वापर विमानात निषिद्ध

नवी दिल्ली : विमानातून प्रवास करत असताना पॉवर बॅंकद्वारे मोबाईल किंवा इतर इलेक्ट्रॉनिक उपकरणे चार्ज करण्यावर बंदी घालण्यात आली आहे. लिथियम बॅटरीवर चालणाऱ्या पॉवर बॅंकमुळे विमानात आग लागण्याच्या घटनांमध्ये जगभरात वाढ झाल्याच्या पार्श्वभूमीवर विमानातील पॉवर बॅंकचा उपयोग रोखला जात असल्याचे हवाई वाहतूक महासंचालनालयाने (डीजीसीए) आदेशात म्हटले आहे. पॉवर बॅंक किंवा स्पेअर बॅटरी जास्त गरम झाल्यामुळे, धूर निघाल्यास किंवा आग लागल्यास प्रवासी आणि विमान कर्मचाऱ्यांचे प्राण धोक्यात येऊ शकतात. अशा स्थितीत पॉवर बॅंक आणि अतिरिक्त बॅटऱ्या प्रवाशांनी हँडबॅग मध्ये  ठेवाव्यात. प्रवास करताना त्यांचा उपयोग केला जाऊ नये, असे ‘डीजीसीए’ने स्पष्ट केले आहे. लिथियम बॅटरीमुळे उद्भवणाऱ्या धोक्याची समीक्षा करण्याचे निर्देश महासंचालनालयाने विमान कंपन्यांना दिले आहेत. केबिनमध्ये आग लागण्याची चिन्हे आधी ओळखणे आणि आग विझवण्याच्या यंत्रणेची प्रभावी तैनाती याकडे लक्ष देण्यास सांगण्यात आले आहे. प्रवाशांना जागरूक करण्यासाठी केबिनमधून घोषणा आणि डिजिटल मेसेजिंग उपयोग केला जावा, असेही सांगण्यात आले आहे.