इंदापूरच्या प्रतिक्षा पाटीलचा अधोमुख श्‍वानासनमध्ये विश्‍वविक्रम

वालचंदनगर - इंदापूर तालुक्यातील जांब गावातील प्रतिक्षा सुनिल पाटील या मुलीच्या ७५ मिनिट ४ सेंकद अधोमुख श्‍वानासनाची गिनेस बुक ऑफ वर्ल्ड रेकॉर्ड पुस्तकामध्ये नोंद झाली असून अधोमुख श्‍वानासनामध्ये विक्रम केला आहे.

इंदापूर तालुक्यातील जांब या छोट्या गावामध्ये प्रतिक्षा सुनिल पाटील राहत असून एका शेतकऱ्याची मुलगी आहे. आई स्वाती व वडिल सुनिल शेतकरी आहेत. ती वालचंदनगर (ता. इंदापूर) येथील भारत चिल्ड्रन्स अॅकॅडमी शाळेमध्ये इयत्ता बारावीमध्ये शिक्षण घेत होती. तिला सुरवातीपासुन योग-प्राणायामाची आवड असल्याने तिने अधोमुख श्‍वानासन करण्याचा सराव सुरु केला. सुरवातीला तिला ३१ मिनिटे अधोमुख श्‍वानासन करता येत होते. शाळेचे प्राचार्य कृष्णदेव क्षीरसागर, पर्यवेक्षक अमोल गोडसे, ज्ञानेश्‍वर जगताप यांनी तिला मार्गदर्शन करुन अधोमुख श्‍वानासनाची वेळ वाढवली. २४ जानेवारी २०२२ रोजी वालचंदनगरमध्ये अधोमुख श्‍वानासनाचा विश्‍वविक्रम करण्यासाठी शाळेमध्ये कार्यक्रमाचे आयोजन करण्यात आले. यामध्ये प्रतिक्षा पाटील हिने ७५ मिनिट ४ सेकंदचाा अधोमुख श्‍वानासन करुन विश्‍वविक्रम केला. सदरच्या कार्यक्रमाचे फोटो, व्हिडिओ गिनेस बुक ऑफ वर्ल्ड रेकॉर्डच्या बेवसाईट अपलोड करण्यात आले होते.

गिनेस बुक ऑफ वर्ल्ड रेकॉर्डने प्रतिक्षा पाटील हिचा अधोमुख श्‍वानासनातील ७५ मिनिट ४ मिनिटांचा रेकॉर्डला मान्यता दिली असून ती जगामध्ये सर्वाधिक अधोमुख श्‍वानासन करणारी व्यक्ति ठरली असल्याचे शाळेचे प्राचार्य कृष्णदेव क्षीरसागर यांनी सांगितले. यापूर्वीचा वर्ल्ड रेकॉर्ड सेदू राम कुमार यांच्या नावावर असून त्यांनी ६२ मिनिट ३ सेकंदाचा वर्ल्ड रेकॉर्ड १५ ऑक्टोबर २०२१ रोजी केला होता. तसेच त्यापूर्वी अमेरिकेतील किकीप्लायना (KIKI FLYNN) हिने ६० मिनिट १८ सेकंदाच्या वर्ल्ड रेकॉर्ड १६ ऑगस्ट २०२० केला होता. वालचंदनगर कंपनीचे व्यवस्थापकीय संचालक व मुख्य कार्यकारी अधिकारी चिराग दोशी, फॅक्टरी मॅनेजर धीरज केसकर, शाळा समितीचे अध्यक्ष आशिष केसकर, उपाध्यक्ष पांडुरंग कवडे यांनी प्रतिक्षा पाटील हिचे अभिनंदन केले आहे.

ग्रामीण भागातील मुले-मुलीमध्ये अनेक कला, क्रिडा गुण असतात. त्यांना ओळखून त्यांच्या गुणांना वाव देण्याचा आमचा प्रयत्न असतो. प्रतिक्षा पाटील ला प्रोत्साहन दिल्यामुळे ३१ मिनिट अधोमुख श्‍वानासन करणारी मुलीने ७५ मिनिट ४ सेंकद अधोमुख श्‍वानासन करुन वर्ल्ड रेकॉर्ड करु शकली. जिद्द व चिकाटी च्या जोरावर तिने यश मिळविले असून विश्‍वविक्रमसाठी घातलेली गवसनी कौतुकास्पद आहे. आज बारावीच्या परीक्षेचा निकाल लागला असून तिने बारीवीमध्ये उज्वल यश मिळविले असल्याचे शाळेचे प्राचार्य कृष्णदेव क्षीरसागर यांनी सांगितले.