पुणे : तब्बल दोन वर्षांनी पूर्व प्राथमिक शाळा ‘अनलॉक’

पुणे - तब्बल दोन वर्षांनंतर कुलूप उघडण्याची परवानगी मिळालेल्या पूर्व प्राथमिक शाळा (Pre-Primary School) बुधवारी चिमुकल्यांच्या (Children) किलबिलाटाने गजबजल्या. शहरातील नर्सरी, छोटा गट (ज्युनियर केजी) आणि मोठा गट (सिनियर केजी) हे वर्ग सुरू झाल्याने मुलांनी उत्साहात शाळेत (School) हजेरी लावली. शाळांनीही आकर्षक सजावट करत आणि कोरोनासंबंधी आवश्यक खबरदारी घेत विद्यार्थ्यांचे स्वागत केले.

कोरोनामुळे मार्च २०२० पासून शाळांना टाळे लागले होते. त्यानंतर संसर्ग कमी असताना माध्यमिक व उच्च माध्यमिक शाळा सुरू करण्यात येत होत्या. पण पूर्व प्राथमिक शाळा मात्र बंदच होत्या. परंतु, आता दोन वर्षांनंतर पूर्व प्राथमिक शाळांना वर्ग खुले करण्याची परवानगी मिळाल्याने मुलांना प्रत्यक्ष शाळेत येण्याची संधी मिळाली. या काळात शाळेत प्रवेश घेऊनही मुलांनी प्रत्यक्ष शाळेत येता आले नाही. त्यामुळे बुधवारी हजारो विद्यार्थ्यांनी पहिल्यांदाच शाळेत पाऊल ठेवले. शाळांनीही फुलांची सजावट करून, फुगे लावून, मुलांना चॉकलेटचे वाटप करून आणि औक्षण करून विद्यार्थ्यांचे स्वागत केले.

काही शाळांमध्ये मुलांनी बगीच्यातील झोका, घसरगुंडी आणि सायकल खेळण्याचा आनंद घेतला. तर काही ठिकाणी विद्यार्थी पारंपरिक वेशभूषेत नटून आले होते. तसेच कोरोनाच्या पार्श्वभूमीवर परिसराचे निर्जंतुकीकरण, सॅनिटायझरची व्यवस्था शाळांनी केली होती. मुलांनाही मास्कचा वापर करण्यास व थोड्या-थोड्या वेळाने हात धुण्याच्या सूचना शिक्षक देत होते.

‘शाळा सुरू झाल्यावर पहिल्या दिवशी प्रवेश घेतलेल्या सर्व मुलांनी हजेरी लावली होती. पालकांनी सूचना दिल्याने मुलांनी पूर्ण वेळ मास्क परिधान केला होता. खूप दिवसांनी शाळेत यायला मिळाल्याने मुलेही उत्साहात होती. पुष्पवृष्टी करून आणि चॉकलेट देऊन त्यांचे स्वागत केले. पहिलाच दिवस असल्याने अभ्यास फार न घेता त्यांच्याशी संवाद साधण्यावर भर दिला.’

- मधुरा चौधरी, मुख्याध्यापिका, सारथी प्राथमिक शाळा