खासगी प्रवासी वाहतूकदारांनी वेळा बदलल्या 

पुणे - सकाळी नऊ ते अकरा आणि सायंकाळी सहा ते आठ ही वेळ वगळून शहरात प्रवेश करण्याचा निर्णय खासगी प्रवासी वाहतूक करणाऱ्या बसचालकांनी सोमवारी झालेल्या बैठकीत घेतला. त्यानुसार नागपूर, अमरावती, चंद्रपूरला जाणाऱ्या बस सुटण्याच्या वेळा बदलण्याचेही ठरले. 

शहरात सकाळी सहा ते रात्री दहा वाजेच्या दरम्यान खासगी प्रवासी वाहतूक करणाऱ्या बसला बंदी घालण्याचे सूतोवाच वाहतूक पोलिसांनी केले होते. त्यामुळे प्रवाशांची गैरसोय होणार आहे, हे चालकांनी पोलिसांच्या निदर्शनास आणले. त्यामुळे दीपावली लक्षात घेऊन प्रवाशांची गैरसोय होऊ नये म्हणून तूर्त बसचालकांनी वर्दळीची सकाळी नऊ ते अकरा आणि सायंकाळी सहा ते आठ ही वेळ वगळून वाहतूक करावी, असे पोलिसांनी सुचविले. दरम्यान, पुणे डिस्ट्रिक्‍ट लक्‍झरी बस असोसिएशनची सोमवारी सायंकाळी बैठक झाली. त्याला संघटनेचे 100 सदस्य उपस्थित होते. 

शहरात सकाळी नऊ ते अकरा आणि सायंकाळी सहा ते आठ ही वेळ वगळून प्रवेश करण्यासाठी बाहेरून सुटणाऱ्या बसच्या वेळा बदलण्याचेही ठरले. त्यामुळे नागपूरहून एरवी सायंकाळी पाच वाजता सुटणारी आणि सकाळी नऊ वाजेपर्यंत शहरात प्रवेश करणारी बस आता दुपारी तीन वाजता सुटणार असून, सकाळी सातपर्यंत ती शहरात पोचेल. अमरावती, चंद्रपूर आदी लांबच्या मार्गांबाबतही असाच निर्णय झाल्याची माहिती संघटनेचे अध्यक्ष बाळासाहेब खेडेकर यांनी दिली. या निर्णयाची लगेचच अंमलबजावणी होणार असल्याचेही त्यांनी सांगितले. 

नियमांचे पालन करून भाडेवाढ 
सणाच्या काळात प्रवासीभाडे वाढविण्याबाबतही या बैठकीत चर्चा झाली. उच्च न्यायालयाने याबाबत आदेश दिला असून, त्याचे पालन करण्याचेही ठरले. सणाच्या काळात एसटी महामंडळाच्या बसच्या भाड्याच्या दीडपट भाडे वाढविता येणार नाही, असे न्यायालयाने स्पष्ट केले आहे. त्याचे पालन करूनच भाडेवाढ झाली आहे. सणाच्या काळात पुण्यातून बाहेर जाणाऱ्या प्रवाशांची संख्या वाढते. मात्र परतीच्या प्रवासाला पुरेसे प्रवासी मिळत नाहीत. त्यामुळे भाडेवाढ करावी लागते, असेही बाळासाहेब खेडेकर यांनी सांगितले. 

पिकअप पॉइंट्‌सवर चर्चा 
प्रवासी वाहतूक करणाऱ्या संघटनेची वाहतूक पोलिसांबरोबरच नुकतीच बैठक झाली. प्रामुख्याने पिकअप पॉइंट्‌सवर त्यात चर्चा झाली. त्यानुसार वाहतूकदार येत्या दोन दिवसांत पोलिस आणि महापालिकेकडे पिकअप पॉइंट्‌सची यादी देणार आहेत.