खासगी ट्रॅव्हलची मनमानी

पिंपरी - तुम्ही जर खासगी ट्रॅव्हलच्या बसने बाहेरगावी जाण्याचे नियोजन करत असाल, तर जादाचे पैसे मोजण्याची तयारी ठेवा. ऐन सणासुदीच्या काळात खासगी ट्रॅव्हलने बसच्या भाड्यात तिपटीने वाढ केली आहे. परिवहन विभागाचे याकडे दुर्लक्ष असल्याने प्रवासी त्रस्त झाले आहेत. 

शहरातून नागपूर, अहमदाबाद, जळगाव, इंदूर आदी ठिकाणी जाण्यासाठी नेहमी एक हजार रुपयांपर्यंत भाडे घेतले जाते. त्यात दुप्पट, तिप्पट वाढ केली.  

मागणी का? 
एसटी महामंडळाची अनेक ठिकाणी आंतरराज्य बससेवा नाही. रेल्वे गाड्यांची आरक्षणे फुल्ल झाली आहेत. त्यामुळे प्रवाशांना खासगी बसकडे वळावे लागते. खासगी बसचालकांनी प्रवाशांकडून जादा भाडे आकारू नये, असे आदेश राज्य सरकारने दिले आहेत. मात्र, खासगी ट्रॅव्हलचालक त्याकडे दुर्लक्ष करून जादा भाडे घेतात. अहमदाबाद, इंदूर, हैदराबाद, बंगळुरू या ठिकाणांसाठी आकारण्यात येणाऱ्या भाड्याचे प्रमाण सर्वाधिक आहे. दिवाळी सुटीत त्यात आणखी वाढ होऊ शकते. 

एका खासगी व्यावसायिकाने सांगितले, ‘‘दिवाळीमध्ये खासगी बसला मोठ्या प्रमाणात गर्दी असते. त्यामुळे आम्हाला खासगी बसच्या भाड्यात वाढ करणे अपरिहार्य ठरते.’’

शहरातून बाहेरच्या राज्यांमध्ये जाण्यासाठी बससेवा उपलब्ध नाही. महाराष्ट्राच्या लगतच्या राज्यांमध्ये जाण्यासाठी त्या त्या जिल्ह्यांमधून बससेवा उपलब्ध आहे.
- संजय भोसले, आगार व्यवस्थापक, एसटी महामंडळ, वल्लभनगर

गेल्या अनेक वर्षांपासून दिवाळीत गावी जातो. खासगी ट्रॅव्हलच्या दरवाढीमुळे आर्थिक ताण पडतो. खासगी बसचे भाडे नियंत्रित ठेवण्यासंदर्भात राज्य सरकारने आदेश दिले असले, तरी त्याची अंमलबजावणी होताना दिसत नाही. 
- नितीन शर्मा, प्रवासी  

खासगी भाडे
ठिकाण    वातानुकूलित बस                  
नागपूर    २,५७५ रुपये 
इंदूर    ३,१५० रुपये
अहमदाबाद    २,५२५ रुपये 
जळगाव    १,५७५ रुपये  
अकोला    २,०९० रुपये  
हैदराबाद    २,७५० रुपये 
बंगळुरू    ३००० रुपये