प्रस्तावित आंतरराष्ट्रीय विमानतळ हे पुणे जिल्ह्यातच होईल - अजित पवार | Sakal
sakal

बोलून बातमी शोधा

Ajit Pawar
प्रस्तावित आंतरराष्ट्रीय विमानतळ हे पुणे जिल्ह्यातच होईल - अजित पवार

प्रस्तावित आंतरराष्ट्रीय विमानतळ हे पुणे जिल्ह्यातच होईल - अजित पवार

पुणे - पुणे जिल्ह्यात (Pune District) याआधी प्रस्तावित करण्यात आलेले आंतरराष्ट्रीय विमानतळ (International Airport) हे पुणे जिल्ह्यातच होईल. पण ते नेमके कोणत्या ठिकाणी होईल, त्याची जागा कोणती हे आताच सांगणार नसल्याचे उपमुख्यमंत्री अजित पवार (Ajit Pawar) यांनी शनिवारी (ता.१५) पुण्यात पत्रकारांशी बोलताना सांगितले.

शहर व जिल्ह्यातील कोरोनाचा आढावा घेण्यासाठी पवार पुण्यात आले होते. कोरोना आढावा बैठक संपल्यानंतर ते पत्रकारांशी बोलत होते. पुरंदर येथील प्रस्तावित आंतरराष्ट्रीय विमानतळाच्या जागेबाबत तांत्रिक अडचण निर्माण झाली आहे. त्यामुळे आता हे विमानतळ होणार की नाही, असा लोकांमध्ये संभ्रम आहे, असा प्रश्‍न पवार यांना विचारला असता त्यांनी हा निर्वाळा दिला आहे.

हेही वाचा: अमर मोहिते : पोलीस म्हणतात, कौटुंबिक अडचणींमुळे आलेल्या नैराश्यातून आत्महत्या!

पुणे जिल्ह्यातील प्रस्तावित आंतरराष्ट्रीय विमानतळाबाबतचे अनेक वर्षांपासून भिजत घोंगडे कायम आहे. पूर्वनियोजनानुसार हे विमानतळ खेड तालुक्यात होणार होते. परंतु तेथील स्थानिकांनी विमानतळासाठी आवश्‍यक असणारी जागा देण्यास नकार दिला. या विमानतळाला आंदोलनाच्या माध्यमातून तीव्र विरोध केला. त्यामुळे सरकारने या विमानतळाची जागा बदलण्याचा निर्णय घेतला आणि त्यानुसार हेच विमानतळ पुरंदर तालुक्यात हलविले. तत्कालीन मुख्यमंत्री देवेंद्र फडणवीस यांनी या प्रस्तावित विमानतळाचे छत्रपती संभाजीराजे आंतरराष्ट्रीय विमानतळ असे नामकरणही जाहीर केले आहे.

खेड तालुक्यातील शेतकऱ्यांप्रमाणेच पुरंदर तालुक्यातील शेतकऱ्यांनीही या विमानतळाला जमिनी देण्यास प्रथमपासून तीव्र विरोध सुरु केला आहे. या विरोधामुळे तेथील जागेबाबत तांत्रिक अडचण निर्माण झाली होती. ही अडचण दूर करण्यासाठी काही अंशी जागा बदलण्याबाबतचा प्रस्ताव केंद्र सरकारकडे दिला होता. परंतु हा प्रस्ताव तांत्रिक अडचणीमुळे अद्याप मंजूर होऊ शकला नाही. त्यामुळे पुणे जिल्ह्यातील प्रस्तावित विमानतळ जागेअभावी होणार की नाही, असा प्रश्‍न निर्माण झाला आहे. मात्र काहीही झाले तरी हे आंतरराष्ट्रीय विमानतळ पुणे जिल्ह्यातच होईल आणि याचा फायदा नगर, पुणे, कोल्हापूर, सांगली, सातरा, सोलापूर आदी जिल्ह्यांसह राज्यातील अनेक जिल्ह्यांना होऊ शकेल, असेही पवार यांनी यावेळी स्पष्ट केले.

Read Latest Marathi News Headlines of Maharashtra, Live Marathi News of Mumbai, Pune, Politics, Finance, Entertainment, Sports, Jobs, Lifestyle at Sakal. To Get Updates on Mobile, Download the Sakal Mobile App for Android & iOS.
सकाळ आता सर्व सोशल मीडिया प्लॅटफॉर्मवर. ताज्या घडामोडींसाठी टेलिग्राम, फेसबुक, ट्विटर, शेअर चॅट आणि इन्स्टाग्रामवर आम्हाला फॉलो करा तसेच, आमच्या YouTube Channel आजच Subscribe करा..
loading image
go to top