Pune : खडकवासला प्रकल्पात ७३ टक्के पाणीसाठा; धरणाची पातळी कमी होत असल्याने..

खडकवासला - खडकवासला धरण साखळीतील खडकवासला, पानशेत, वरसगाव, टेमघर या चार धरणांत मिळून शुक्रवारअखेर सुमारे २१.१८ टीएमसी म्हणजे ७२.६५ टक्के पाणीसाठा झाला.

मुठा उजवा कालव्यातून १००५ क्यूसेकने पाणी सोडण्यात येत आहे. दौंड, इंदापूर तालुक्यात अद्याप पाऊस झालेला नाही. म्हणून पाटस, दौंड, तरंगवाडी व अन्य तलावात कालव्यातून सोडलेल्या पाण्यातून भरण्यात येत आहे.

पाऊस कमी झाल्याने परिणामी धरणात येणारा येवा (इनफ्लो) कमी होत गेला. धरणाची पातळी कमी होत असल्याने नदीत सोडलेला विसर्ग कमी करण्यात आला.

खडकवासला धरणातून मुठा नदीत गुरुवारी रात्री ११ वाजता चार हजार २८० क्युसेक पाणी सोडण्यात आले होते. शुक्रवारी पहाटे चार वाजता विसर्ग तीन हजार ४२४ क्यूसेकपर्यंत कमी करण्यात आला.

सकाळी आठ वाजता २५६८, त्यानंतर नऊ वाजता १७१२, ११ वाजता ८५६, १२ वाजता ४२८ क्यूसेक पर्यंत पाणी कमी करण्यात आले. शुक्रवारी दुपारपर्यंत पाऊस थांबल्यामुळे दुपारी एक वाजता विसर्ग पूर्णपणे बंद करण्यात आला.

आज दिवसभरात खडकवासला येथे दोन, पानशेत येथे नऊ, वरसगाव येथे नऊ, टेमघर येथे १०, मुळशी येथे १५, भामाआसखेड एक, पवना १९ मिलिमीटर पाऊस पडल्याची नोंद पाटबंधारे विभागाकडे झाली आहे.