Pune Accident : सिंहगड घाटात दुचाकी घसरली; पती पत्नी जखमी

खडकवासला : सिंहगड घाटात गडावरून परत येताना शनिवारी दुपारी दुचाकी घसरल्याने दोघे जण जखमी झाले असून यात एका महिलेचा समावेश आहे. अशी प्राथमिक माहिती मिळाली आहे. सिंहगड घाटात शनिवारी दुपारच्या दीड वाजता हि घटना घडली आहे. यामध्ये विक्रम ठाकूर व शोभा ठाकूर (वय ४५) हे दोघे जखमी झालेले आहेत.

शोभा यांच्या डोक्याला मार लागला आहे. त्यांना तातडीने १०८च्या रुग्णवाहिकेच्या माध्यमातून ससून रुग्णालयात दाखल करण्यासाठी नेले आहे. अशी माहिती वन विभागाच्या उपद्रव शुल्क नाक्यावरून मिळाली आहे.

हे दोघे पती पत्नी आहेत. दोघे दुचाकीने (एमएच ३१ - सीडी ३०२७) सकाळी सिंहगडावर फिरायला गेले होते. गडावरून परत येताना जगताप माचीजवळ वडाचे झाड असलेल्या परिसरात आल्यावर अचानक त्यांची गाडी घसरली. दोघे हि गाडीवरून खाली पडले.

यात दोघे हि जखमी झाले आहेत. आज शनिवार असल्याने पर्यटकांची संख्या चांगली आहे. अपघातानंतर गडावर जाणाऱ्या एका पर्यटकांने त्यांना त्याच्या कार मधून खाली नाक्यावर आणले. नाक्यावर खानापूर येथील प्राथमिक आरोग्य केंद्रातील १०८ क्रमांकाची रुग्णवाहिका पोचली होती. त्यात बसवून ससून येथे दाखल करण्यासाठी नेले.

दरम्यान, अपघाताची माहिती वन विभागाला माहिती मिळाली. गोळेवाडी नाका येथून वनरक्षक संदीप कोळी, वन संरक्षण समितीचे सुरक्षा रक्षक नितीन गोळे, नीलेश सांगळे, सचीन थोपटे घटना स्थळी मदतीसाठी धावले.