पुणे : आंबिल ओढ्याच्या भिंतीसाठी १२ कोटी रुपये

पुणे : आंबिल ओढ्याला (ambil odha) बाजूने संरक्षक भिंत बांधण्यासाठी महापालिकेने काम हाती घेतले आहे. यात बहुतांश काम पूर्ण झाले असले तरी यासाठी निधी उपलब्ध नव्हता. यासाठी ११ कोटी ९६ लाख रुपये वर्गीकरणाद्वारे उपलब्ध करून देण्याचा प्रस्ताव स्थायी समितीसमोर ठेवण्यात आला आहे.

दोन वर्षापूर्वी झालेल्या मुसळधार पावसामुळे आंबिल ओढ्याला पूर आला होता, त्यावेळी कात्रज पासून ते नवी पेठे पर्यंत आंबिल ओढ्याचा शेजारील निवासी भागात मोठ्याप्रमाणात वित्त व जीवितहानी झाली होती. नागरिकांच्या सुरक्षेसाठी या ठिकाणी सीमा भींत बांधण्याची मागणी केली जात होता. त्यानुसार महापालिकेने पद्मजा पार्क ते के. के. मार्केट, पेशवे तलाव ते पद्मजा पार्क, पद्मावती पूल ते गजानन महाराज चौक ते के. के. मार्केट, पद्मावती पूल ते गजानन महाराज चौक ते वैकुंठ स्मशानभूमी मुठा नदी पर्यंत सिमाभिंत बांधण्याचे काम सुरू आहे. यासाठी महापालिकेने सुमारे २० कोटी रुपयांची निविदा काढली आहे. महापालिकेने अंदाजपत्रकात या कामासाठी ९ कोटी रुपयांची तरतूद केलेली आहे.

महापालिकेने या तरतूदीनुसार काम सुरू केले, ही सिमाभींती बांधण्याचे काम सुमारे ७० टक्के पूर्ण झाले आहे. उर्वरीत कामे करायची असल्याने व ठेकेदाराची बिले द्यायची असल्याने ११ कोटी ९६ लाख रुपये वर्गीकरण करण्याचा प्रस्ताव ठेवला आहे. मलनिःसारण देखभाल दुरूस्ती विभागाने अंदाजपत्रकात शहरात वारंवार ज्या भागात पाणी साचते तेथे पाण्याचा निचरा होण्यासाठी पावसाळी लाईन टाकणे, कलव्हर्ट बांधणे या कामांसाठी तरतूद केली होती. ही तरतूद वर्गीकरणाद्वारे सिमाभिंतीच्या कामासाठी दिली आहे, असे अतिरिक्त आयुक्त डॉ. कुणाल खेमणार यांनी सांगितले.