Pune : पशुसंवर्धन विभागातील कर्मचाऱ्यांचे असहकार आंदोलन

पुणे : पशुसंवर्धन विभागाच्या सुधारित आकृतिबंधामध्ये गट ‘ड’ संवर्गातील सर्वच तर, कनिष्ठ लिपिक संवर्गातील काही पदे रद्द करण्याचे राज्य सरकारचे धोरण आहे. या धोरणाच्या विरोधात पशुसंवर्धन विभाग कर्मचारी संघटनेने सोमवारपासून (ता. २८) असहकार आंदोलन पुकारले आहे.

या संदर्भात महसूल आणि पशुसंवर्धन मंत्री राधाकृष्ण विखे पाटील यांना निवेदन देण्यात आले आहे. गट ‘क’मधील लिपिक टंकलेखक, वाहनचालक तसेच ‘ड’ मधील नाईक, दफ्तरबंद, शिपाई, परिचर, रात्रपहारेकरी संवर्गातील अनेक पदे निरस्त करण्यात आली आहेत. भविष्यात ही पदे कमी करण्याचे सरकारचे धोरण असल्याचे निदर्शनास आले आहे. त्यामुळे पशुसंवर्धन विभागाच्या सुधारित आकृतीबंधाबाबत अधिकारी, कर्मचाऱ्यांमध्ये तीव्र असंतोष निर्माण झाला आहे. पशुसंवर्धन विभागात अधिकारी आणि कर्मचाऱ्यांचे मोठे योगदान आहे. परंतु पशुसंवर्धन विभागाचा सुधारित आकृतिबंध करताना याकडे दुर्लक्ष झाले आहे.

या आकृतीबंधामधील पदे रद्द करण्याचा प्रस्ताव पूर्णपणे रद्द करण्यात यावा. न्याय्य मागण्यांकडे लक्ष वेधण्यासाठी लिपिक कर्मचारी १४ नोव्हेंबरपासून काळी फीत बांधून काम करीत आहोत. २५ नोव्हेंबर रोजी मुंबई येथील आझाद मैदान येथे सुधारित आकृतिबंध रद्द करावा, यासाठी धरणे आंदोलन करण्यात आले. तसेच, पशुसंवर्धन विभागाचे प्रधान सचिव, आयुक्त यांना निवेदन देण्यात आले आहे. तथापि त्याला कोणताही प्रतिसाद मिळालेला नाही. त्यामुळे संघटनेच्या वतीने सोमवारपासून असहकार आंदोलन सुरु करण्यात आले आहे. या संदर्भात महसूल व पशुसंवर्धन मंत्री राधाकृष्ण विखे पाटील यांनी लक्ष घालून कर्मचाऱ्यांवरील अन्याय दूर करावा, अशी मागणी संघटनेचे अध्यक्ष अंकुश शेजाळ यांनी निवेदनाद्वारे केली आहे.