Baramati Accident: भरधाव वेगात असणाऱ्या ट्रकच्या धडकेत दुचाकीवरील वडिल जागीच ठार; तर उपचारा दरम्यान...

डोर्लेवाडी - बारामती वालचंदनगर रस्त्यावर सोनगाव हद्दीमध्ये भरधाव वेगात असणाऱ्या चारचाकी हायवा ट्रकच्या धडकेत दुचाकीवरील वडिल जागीच ठार झाले तर मुलाचाही उपचारा दरम्यान मृत्यू झाल्याने परिसरात हळहळ व्यक्त होत आहे.

सतीश रामदास पवार वय. (३८) मुलगा आर्यन सतीश पवार (वय १२) रा.आसू (ता. फलटण) असे अपघातात ठार झालेल्यांची नावे आहेत.

मयत सतीश पवार व मुलगा आर्यन हे आपल्या दुचाकी क्र एम एच ११ सी एस ७४७२ वरून आज (ता.२९) रोजी सकाळी सव्वा नऊच्या सुमारास बारामतीच्या दिशेने जात असताना बारामतीकडून भरधाव वेगात येणारा हायवा ट्रक क्र एम एच ४२ ए.ओ.८२५५ यांची सोनगाव येथे समोरा समोर धडक झाली.

यामध्ये सतीश पवार हे जागीच ठार झाले तर त्यांचा मुलगा आर्यन याला तातडीने रूग्णालयात उपचारासाठी दाखल करण्यात आले. मात्र उपचारा दरम्यान त्याचाही मृत्यू झाल्याने आसू व सोनगाव परिसरात हळहळ व्यक्त होत आहे. दरम्यान घटनेची माहिती मिळताच पोलीस निरीक्षक प्रभाकर मोरे यांनी पोलीस हवालदार गणेश पवार यांना घटनास्थळी पाठवत पंचनामा केला.

गुन्हा दाखल करण्याची कार्यवाही सुरू आहे.दरम्यान गेल्या महिन्यात याच दिवशी (ता.२९) रोजी सोनगाव येथे एक लहान मुलगा ट्रकखाली येऊन ठार झाला होता. या दोन्ही घटनेने परिसरात संतप्त वातावरण तयार झाले असून दोषींवर कडक कारवाई करावी अशी मागणी ग्रामस्थांकडून होत आहे.