Pune : बारामतीत 38 लाखांचे प्रतिबंधित भेसळयुक्त पदार्थ जप्त

बारामती - तालुक्यातील चौधरवस्तीनजिक असलेल्या गोदामातून पोलिसांनी तब्बल 38 लाखांचे प्रतिबंधीत अन्न भेसळयुक्त पदार्थ जप्त केले. या प्रकरणी दादा उर्फ नारायण रमेश पिसाळ (रा. बारामती), शरद सोनवणे (रा.सांगोला, जि. सोलापूर) व प्रशांत गांधी (रा. बारामती) (पूर्ण नावे नाहीत) यांच्या विरुध्द भा.दं.वि 1860 चे कलम 328, 188, 272,273, अन्न सुरक्षा मानके अधिनियमाच्या कलमान्वये गुन्हा दाखल करण्यात आला आहे.

पोलिस कर्मचारी अभिजित एकशिंगे यांनी या संदर्भात फिर्याद दिली आहे. दादा पिसाळ याने शरद सोनवणे याच्या सांगण्यानुसार कर्नाटकातून हिरा पानमसाला, रॉयल 717 सेंटेड तंबाखू असा 38 लाख 40 हजारांचा माल आणला होता. स्थानिक गुन्हे अन्वेषण विभागाला या बाबत माहिती मिळाल्यानंतर त्यांनी या बाबत कारवाई केली.

सदर माल असलेला टेंपो पुढील विक्रीसाठी प्रशांत गांधी यांच्या गोदामात आणून लावण्यात आला होता. त्या मुळे मानवी जिवीतास धोका उत्पन्न होईल अशा स्वरुपाच्या मालाची वाहतूक व विक्रीचा उद्देश विचारात घेत पोलिसांनी गुन्हा दाखल केला आहे. सहायक पोलिस निरिक्षक राहुल घुगे पुढील तपास करीत आहेत.