Pune Cab News : दुसऱ्या दिवशीही कॅब सेवा विस्कळित

पुणे : भाडेवाढ मिळावी, या मागणीसाठी शहरातील कॅबचालकांनी सुरू केलेल्या वाहतूक बंद आंदोलनामुळे सर्वसामान्य प्रवाशांना फटका बसत असल्याचे बुधवारीही (ता. ६) दिसून आले.

ओला, उबरने दरवाढ करावी, या मागणीसाठी ‘बघतोय रिक्षावाला’ आणि ‘मोटार, टॅक्सी ट्रान्स्पोर्ट असोसिएशन’ संघटनांनी कॅबचालकांना संप करण्याचे आवाहन केले आहे. त्यामुळे शहरातील कॅब वाहतूक गेल्या दोन दिवसांपासून विस्कळित झाली आहे.

त्याचा फटका प्रवाशांना बसत आहे. विमानतळ, पुणे रेल्वे स्टेशन, एसटी स्थानक, रुग्णालये, महाविद्यालये, शासकीय आणि खासगी कार्यालये येथील प्रवाशांची गैरसोय झाल्याचे बुधवारी दिसून आले.

दरम्यान, कॅबच्या दरात वाढ करणार नसल्याचे उबरने स्पष्ट केले आहे. दरवाढ केल्यास प्रवाशांना ६० टक्के अधिक भुर्दंड पडेल, असे उबरचे म्हणणे आहे. या बाबत तोडगा काढण्याचे प्रयत्न सुरू आहेत, असे प्रादेशिक परिवहन अधिकारी संजीव भोर यांनी सांगितले.