पुण्यातील कॅम्प परिसरातील फॅशन स्ट्रीट भागात गोळीबार

पुणे : पुण्यातील गजबजलेल्या भागात गोळीबार केल्याची घटना घडली आहे. कॅम्प परिसरातील फॅशन स्ट्रीट या भागात एका तरूणाने गोळीबार केल्याची माहिती पोलिसांनी दिली आहे. या गोळीबारात एक तरूण किरकोळ जखमी झाला आहे.

(Pune Fashion Street Firing)

पोलिसांनी दिलेल्या माहितीनुसार, एका तरुणाने दुसऱ्यावर पूर्व वैमनस्यातून छर्‍याच्या बंदुकीतून गोळी झाडली आहे. हे दोघेही एकमेकांना ओळखतात पण पूर्वीच्या वादाचा बदला म्हणून हा गोळीबार करण्यात आल्याचं सांगितलं आहे. दरम्यान जखमीला हॉस्पिटलमध्ये दाखल करण्यात आलं असून पुढील तपास चालू असल्याची माहिती पोलिसांनी दिली आहे.

तौफिक अख्तर शेख (वय ४५, रा. भीमपुरा, लष्कर) असे जखमी झालेल्याचे नाव आहे. उपचारासाठी रुग्णालयात दाखल करण्यात आले आहे. जुल्फीफार शेख नावाच्या व्यक्ती विरुद्ध रात्री उशिरा लष्कर पोलिस ठाण्यात गुन्हा दाखल करण्यात आला. पोलिसांनी दिलेल्या माहितीनुसार, तौफिक शेख व जुल्फीकार शेख यांचे फॅशन स्ट्रीट परिसरात व्यवसाय आहेत. मागील काही महिन्यांपासून तौफिक व जुल्फीकार यांच्यात वाद सुरू आहेत. मंगळवारी रात्री साडे आठच्या सुमारास तौफिक फॅशन स्ट्रीट परिसरातील एका दुकानाजवळ थांबले हाेते. त्या वेळी जुल्फीकार तेथे आला आणि त्याने त्याच्याकडील छऱ्याच्या बंदुकीतून तोफिकवर गोळीबार केला.

गोळीबाराच्या या घटनेनंतर फॅशन स्ट्रीट परिसरातील नागरीक व व्यावसायिक यांच्यात मोठ्या प्रमाणात घबराट पसरली. या घटनेची माहिती मिळताच लष्कर पोलीस ठाण्याचे वरिष्ठ पोलीस निरीक्षक अशोक कदम यांनी घटनास्थळी जाऊन तपास सुरू केला. तेव्हा जुल्फिकारने गोळीबार केल्याची माहिती मिळाली. जुल्फीकारला पकडण्यासाठी पोलिसांची पथके रवाना झाली आहे.