वेशभूषा बदलून फिरणारा गांजा तस्कर अटकेत

पुणे, ता. ८ : गांजा तस्करी प्रकरणात पोलिसांना गेले चार महिने गुंगारा देणाऱ्या एकाला भारती विद्यापीठ पोलिसांनी अटक केली.
अजय पोपटराव पाडुळे (वय ३०, रा. नवीन म्हाडा वसाहत, हडपसर) असे अटक करण्यात आलेल्याचे नाव आहे. पाडुळे आणि त्याचा साथीदार चारुदत्त चव्हाण यांच्यावर गांजा तस्करी प्रकरणात भारती विद्यापीठ पोलिसांनी गुन्हा दाखल केला होता. चव्हाण याच्याकडून ३५ किलो गांजा जप्त करण्यात आला होता. गुन्हा दाखल झाल्यानंतर पाडुळे पसार झाला. तपासात पाडुळे हा शहरात गांजा विक्री करत असल्याची माहिती मिळाली. पाडुळे याने वेशभूषा बदलली होती, तसेच तो समाजमाध्यमांचा वापर करत नसल्याने त्याचा शोध घेण्यात अडचण आली होती. पाडुळे हा म्हाडा वसाहतीत आईला भेटण्यासाठी येणार असल्याची माहिती भारती विद्यापीठ पोलिस ठाण्याच्या तपास पथकातील पोलिस उपनिरीक्षक नीलेश मोकाशी, किरण साबळे, मंगेश गायकवाड, तुकाराम सुतार, मंगेश पवार आणि संदीप आगळे यांना मिळाली. त्यानंतर पोलिसांच्या पथकाने सापळा लावून त्याला ताब्यात घेतले. पाडुळे याच्यावर भारती विद्यापीठ, लोणी काळभोर, वानवडी पोलिस ठाण्यांत अमली पदार्थ प्रतिबंधक कायद्यान्वये गुन्हे दाखल झाले असून, तो या गुन्ह्यांत पसार आहे.