पुणे - कुटुंबाला जेलमध्ये टाकण्याची धमकी देवून एक कोटी २२ लाखांची खंडणी उकळल्याप्रकरणी विशेष सरकारी वकील ॲड. प्रवीण चव्हाण यांच्यासह तिघांवर डेक्कन पोलिसांनी दाखल केला आहे. तत्कालीन विरोधी पक्षनेते देवेंद्र फडणवीस यांनी विधिमंडळात या कथित भ्रष्टाचाराची संभाषण असलेली पेनड्राइव्ह सादर करून खळबळ उडवून दिली होती.
याप्रकरणी सूरज सुनील झंवर (रा. सुहास कॉलनी, जळगाव) यांनी सोमवारी (ता. १६) फिर्याद दिली आहे. ॲड. प्रवीण पंडित चव्हाण (रा. मोदीबाग, शिवाजीनगर), शेखर मधुकर सोनाळकर (रा. जळगाव) आणि उदय नानाभाऊ पवार (रा. चाळीसगाव, जि. जळगाव) अशी गुन्हा दाखल झालेल्या संशयितांची नावे आहेत.
फिर्यादी झंवर यांचा जळगाव येथे वेअर हाउसिंगचा व्यवसाय आहे. भाईचंद हिराचंद सोनी मल्टिस्टेट पतसंस्था दिवाळखोरीत निघाल्यानंतर अवसायकामार्फत पतसंस्थेच्या जप्त मालमत्तेचा लिलाव करण्यात आला. त्यात फिर्यादीचे वडील सुनील झंवर यांनी घोल रोड, निगडी आणि नसिराबाद येथील मिळकती इ- लिलावात खरेदी केल्या. या प्रकरणात सुनील झंवर यांच्याविरोधात फसवणुकीचा गुन्हा दाखल करून डेक्कन पोलिसांनी त्यांना अटक केली. या गुन्ह्याचा तपास आर्थिक गुन्हे शाखेकडे सोपविण्यात आला होता.
या प्रकरणी ॲड. प्रवीण चव्हाण यांची विशेष सरकारी वकील म्हणून नेमणूक करण्यात आली होती. चव्हाण यांनी उदय पवार यांच्यामार्फत सूरज झंवर यांना ‘तुझ्या वडिलांची चार-पाच वर्षे जेलमध्ये वाट लावून टाकतो. वडिलांना जामीनावर सोडायचे असल्यास दोन कोटी रुपयांची व्यवस्था कर, अशी धमकी दिली. त्यामुळे भीतीपोटी ॲड. चव्हाण याच्या सांगण्यावरून उदय पवार याला रोख एक कोटी २२ लाख रुपये दिले. त्यानंतर चव्हाण याने ‘मी आणि शेखर सोनाळकर तुझे सर्व कामे करून देतो’, असे सांगितले.
परंतु चव्हाण याने कोणतीच मदत केली नाही. याउलट वडील सुनील झंवर यांनी मिळकती विकत घेताना ६१ कोटींची अफरातफर केल्याचा अहवाल उच्च न्यायालयात सादर केला. येरवडा कारागृहातून बाहेर आल्यानंतर वडिलांनी चव्हाण आणि पवार यांना पैसे परत करण्याची मागणी केली. परंतु चव्हाण याने फोनवर धमकी दिली, असे झंवर यांनी फिर्यादीत नमूद केले आहे.
माझ्याविरोधात खोटा गुन्हा दाखल करण्यात आला आहे. घटना घटल्यानंतर दीड वर्षांनंतर हा गुन्हा दाखल झाला आहे. त्यामुळे गुन्हा दाखल करण्यामागील उद्देश यातून स्पष्ट होतो.
- ॲड. प्रविण चव्हाण.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.