Pune Cold : पुणे शहरात कडाक्याची थंडी; पुन्हा @११.९

पुणे - ढगाळ हवामानामुळे आठवड्याभरापुर्वीच गायब झालेली थंडी आता जोमाने परतली असून, शहरात दिवसेंदिवस कडाक्याची थंडी पडत आहे. गुरुवारी (ता.१) शहरातील किमान तापमान पुन्हा ११.९ अंश सेल्सिअसवर येऊन ठेपले आहे. आठवडाभर तरी शहरात कडाक्याची थंडी कायम राहील असा अंदाज हवामान खात्याने वर्तविला आहे.

गेल्या दोन दिवसांपासून शहरातील थंडीची तीव्रता वाढली आहे. पारा पुन्हा १२ अंशांच्या खाली घसरला असून, गेल्या महिन्याप्रमाणेच पुणेकरांना हुडहुडी भरली आहे. दिवसभर निरभ्र आकाश व उत्तरेकडून येणाऱ्या थंड वाऱ्यांमुळे शहरातील किमान तापमानात मोठी घसरण झाली आहे. अगदी चार दिवसांपूर्वी २० अंश सेल्सिअसच्या आसपास असलेले कमाल तापमान १० ते १२ अंश सेल्सिअसवर येऊन ठेपले आहे. किमान तापमानात एकदम घट झाली. परिणामी, पहाटे आणि सकाळीही बोचरे वारे वाहात होते. शिवाजीनगर, पाषाण आदी परिसरात कडाक्याची थंडी पडत असून, लोहगाव, चिंचवड आणि मगरपट्ट्यात तुलनेने कमी कडाका जाणवत आहे. पुढील तीन दिवस तरी आकाश मुख्यतः निरभ्र, पहाटे आणि रात्रीच्या वेळी कडाक्याची थंडी कायम राहणार आहे.

राज्यातही थंडी वाढला..

राज्यातही अनेक ठिकाणी तापमानाचा पारा घसरला असून, अनेक ठिकाणी शेकोट्या पेटल्या आहेत. मुंबई आणि कोकणात मात्र काही ठिकाणी ढगाळ वातावरण पाहायला मिळत आहे. पुढील दोन दिवसांनंतर राज्यात थंडीचा कडाका अधिक वाढण्याची शक्यता आहे. सरासरी किमान तापमान एक ते दोन अंश सेल्सिअसपेक्षा कमी राहील, असा अंदाज हवामान तज्ज्ञांनी व्यक्त केला आहे.

गुरूवारी पहाटेचे किमान तापमान (अंश सेल्सिअस)

शिवाजीनगर - ११.९

पाषाण - १२.८

लोहगाव - १५.२

चिंचवड - १८.०

लवळे - १८.४

मगरपट्टा - १८.६