विनापरवाना फटाके स्टॉलचा पुण्यामध्ये सुळसुळाट

पुणे : दिवाळी अवघ्या काही दिवसांवर येऊन ठेपलेली असताना शहरात फटाका स्टॉलची संख्याही वाढत आहे. अग्निशामक दलाचे ‘ना हरकत प्रमाणपत्र’ न घेताच पादचारी मार्ग, रस्ते, मोकळ्या जागांवर बिनधास्तपणे स्टॉल लावले जात आहेत. याकडे महापालिका प्रशासनासह पोलिसांचेही दुर्लक्ष होत असल्याचे चित्र दिसून येत आहे.

महापालिकेतर्फे दरवर्षी फटाके विक्रीच्या स्टॉलसाठी प्रत्येक क्षेत्रीय कार्यालयाच्या परिसरात जागा निश्‍चीत केली जाते. स्टॉल सुरू करण्यासाठी मालमत्ता विभाग, अग्निशामक दल, वाहतूक पोलिस यांच्या परवानगीची गरज असते. खासगी जागा, रस्ते आणि पादचारी मार्गांच्या परिसरात स्टॉल उभे करण्यास महापालिकेकडून परवानगी दिली जात नाही. मालमत्ता व्यवस्थापन विभागाने यंदा शनिवार पेठेतील वर्तक बाग येथे ३५ दुकानांना परवागनी दिली असून, इतर १४ क्षेत्रीय कार्यालयांच्या अंतर्गत १३९ स्टॉलला परवागनी दिली आहे. यातून महापालिकेला सुमारे १० लाख रुपयांपेक्षा जास्त उत्पन्न मिळाले आहे.

शहराच्या मध्यवर्ती भागात बेकायदा फटाके स्टॉल उभारले नसले, तरी उपनगरांमध्ये मोठ्याप्रमाणात बेकायदेशीरपणे स्टॉल सुरु करण्यात आले आहेत. काही ठिकाणी खासगी मैदानात स्टॉल टाकण्यात आले आहेत. याठिकाणी अग्निशामक दलाने परवानगी दिलेली नाही. यामुळे दुर्घटना घडल्यास त्यास जबाबदार कोण, असा प्रश्‍न उपस्थित होत आहे.

उपनगरांमध्ये स्थानिक नगरसेवक किंवा इतर राजकीय पदाधिकाऱ्यांच्या आशीर्वादाने स्टॉल लावण्यात आलेले आहेत. त्यामुळे या स्टॉलवर संबंधित भागातील महापालिकेचे अधिकारी, कर्मचारी, पोलिस दुर्लक्ष करत आहेत.

२५ लाखांचे उत्पन्न

मालमत्ता व्यवस्थापन विभागाने केलेल्या लिलावातून ३५ स्टॉल भाड्याने दिले आहेत. त्यातून १० लाखांचे उत्पन्न मिळाले आहे. त्याचप्रमाणे क्षेत्रीय कार्यालयांकडूनही १३९ स्टॉल भाड्याने दिल्याने त्यातून सुमारे १५ लाखांची पालिकेच्या तिरोजीत भर पडली आहे.

"रस्ते, पादचारी मार्ग याठिकाणी फटाके स्टॉल लावता येत नाहीत. बेकायदा स्टॉलवर कारवाई सुरू असून, आतापर्यंत २६ स्टॉलवर कारवाई केली आहे. यापुढेही ही कारवाई करण्यात येणार आहे."

- माधव जगताप, उपायुक्त, अतिक्रमण विभाग

"महापालिकेने ज्या जागा निश्‍चित केल्या आहेत, तेथील व्यावसायिकांना ना हरकत प्रमाणपत्र दिले आहे. पादचारी, मार्ग, रस्ते किंवा खासगी जागांमधील विक्रेत्यांना आम्ही परवानगी दिली नाही. अग्निशामक दलाच्या ‘एनओसी’शिवाय स्टॉल लावता येत नाही. अशा दुकानांवर अतिक्रमण व इतर विभागांकडून कारवाई अपेक्षित आहे."

- प्रशांत रणपिसे, प्रमुख, अग्निशामक दल