PMC Election: पुण्यात रिपाइला हवे भाजपचे चिन्ह अन २० जागा

पुणे : पुणे महापालिकेची आगामी निवडणूक आम्ही रिपाइला सोबत घेऊन लढणार असे भाजपने स्पष्ट केल्यानंतर आजा रिपाइने शहरात २० जागांवर दावा केला आहे. गेल्या पाच वर्षात पक्षाचा विस्तार झाला असून, योग्य उमेदवार असल्याने या जागा हव्या आहेत. तसेच भाजपच्या कमळाच्या चिन्हावरच आम्ही निवडणूक लढणार असल्याचे रिपाइचे शहराध्यक्ष शैलेंद्र चव्हाण यांनी सांगितले.

पुणे महापालिकेची प्रारूप प्रभाग रचना जाहीर झाल्यानंतर राजकीय घडामोडी आणि आरोप प्रत्यारोपाला सुरवात झाली आहे. प्रभाग रचना जाहीर होताच, राष्ट्रवादीच्या शहराध्यक्षांनी आघाडीची भूमिका सोडून थेट स्वबळाची भाषा केली आहे. त्यास शिवसेना व काँग्रेसकडून जशास तसे उत्तर दिले आहे. तर सभागृहनेते गणेश बीडकर यांनी रिपाइला सोबत घेऊन निवडणूक लढविणार असल्याचे पत्रकार परिषदेत स्पष्ट करत राष्ट्रवादीने स्वबळाची भाषा करत शिवसेनेवर अन्याय केला असा आरोप केला होता.

रिपाइचे शहराध्यक्ष चव्हाण, उपमहापौर सुनीता वाडेकर, डॉ. सिद्धार्थ धेंडे यांनी आज आम्ही भाजपसोबत असल्याचे स्पष्ट केले. ‘‘गेल्यावेळी आम्ही १२ जागा लढविल्या होत्या, त्यातील तीन अर्ज बाद झाले. ९ पैकी पाच ठिकाणी आमचे उमेदवार निवडून आले. आमची कामगिरी चांगली होती, असे धेंडे यांनी सांगितले.

जगतापांची बीडकरांना २५ लाखाची आॅफर

राष्ट्रवादीकडे उमेदवार नाहीत, त्यांच्यात हिंमत असेल तर २४ तासात ८० उमेदवारांची यादी जाहीर करावी असे आव्हान बीडकर यांनी दिले होते. त्यास राष्ट्रवादीचे शहराध्यक्ष प्रशांत जगताप यांनी प्रतिआव्हान दिले आहे. बीडकर यांनी स्वतःची उमेदवारी, महापौर, स्थायी समिती अध्यक्ष, जगदीश मुळीक, औंध, बाणेर बालेवाडीसह ५० ठिकाणचे उमेदवार २४ तासात जाहीर करावेत. मी बीडकरांना २५ लाख रुपये देतो, असे सांगितले.

आमची काळजी करू नका - शिवसेना

भाजपने आमच्यासोबत कशी वागली हे सर्वांना माहिती आहे, त्यामुळे आता राष्ट्रवादी आमच्यावर अन्याय करत आहे हे भाजपने सांगू नये. राष्ट्रवादीशी चर्चा करण्यासाठी आम्ही समर्थ आहोत, आमची काळजी करू नका अशी टीका नगरसेवक बाळा ओसवाल यांनी बीडकरांवर केली.