Pune Crime : बारामतीत एकाच रात्रीत 14 सदनिका चोरट्यानी फोडल्या; जवळपास 20 तोळे सोनं चोरले...

बारामती - शहरातील जिल्हा क्रीडा संकुलानजिक 14 सदनिका फोडून अज्ञात चोरट्यानी जवळपास साडे बावीस तोळे सोने व एक लाख रुपयांची रोकड लंपास केल्याची धक्कादायक घटना बारामती शहरात घडली आहे.

आज पहाटे तीन ते चारच्या सुमारास चार चाकी वाहनातून आलेल्या पाच ते सहा जणांच्या टोळीने जिल्हा क्रीडा संकुला नजिक पाच अपार्टमेंटमधील जवळपास 14 सदनिकांना लक्ष्य करून कुलूप व कडी कोयंडे तोडून या घरफोडया केल्या आहेत.

अतिरिक्त पोलिस अधीक्षक आनंद भोईटे, उपविभागीय पोलिस अधिकारी गणेश इंगळे, पोलीस निरीक्षक दिनेश तायडे यांच्यासह स्थानिक गुन्हे अन्वेषण शाखेचा फौज फाटा घटनास्थळी दाखल झाला आहे.

एकाच रात्रीत टोळीने 14 सदनिका फोडल्यामुळे बारामती शहरात चिंतेचे वातावरण आहे. सुदैवाने या घटनेमध्ये कोणत्याही नागरिकाला चोरट्याने मारहाण केलेली नसून बंद सदनिकांना लक्ष्य केल्याची माहिती उपविभागीय पोलीस अधिकारी गणेश इंगळे यांनी दिली.

एकाच रात्रीत इतक्या मोठ्या प्रमाणात घर फोड्या होत असताना गस्तीवरचे पोलीस नेमके कोठे होते व एवढ्या घरफोड्या झाल्यानंतर देखील कोणाला त्याचा कसा सुगावा लागला नाही याबाबत आश्चर्य व्यक्त केले जात आहे. पोलिसांनी सीसीटीव्ही सीसीटीव्ही फुटेज तपासून तातडीने तपास सुरू केला आहे.

दरम्यान पोलिसांची चार पथके तयार करण्यात आली असून चोरट्यांच्या गाडीचे व चोरट्यांचे सीसीटीव्ही फुटेज मिळाल्याची माहिती अतिरिक्त पोलीस अधीक्षक आनंद भोईटे यांनी दिली. ज्या फ्लॅटमध्ये घरफोड्या झाल्या आहेत त्यापैकी बऱ्याचशा सदनिका बंद अवस्थेतील आहेत. एकाच सदनिकेमध्ये जवळपास 20 तोळे सोनं चोरीला गेल्याचेही त्यांनी सांगितले