पुणे : गुन्हेगारीवरून भाजप राष्ट्रवादीमध्ये आरोपाच्या फैरी

पुणे : भाजप आणि राष्ट्रवादीचे पदाधिकारी पक्षातील गुन्हेगारीबद्दल आरोपप्रत्यारोप करत असताना आज या वादात भर पडली. महापौरांसह इतर पदाधिकाऱ्यांवर थेट संघटित गुन्हेगारीचा आरोप करत भाजपच्या नगरसेवकावर वानवडी येथे गुन्हा दाखल झाल्यानंतर फिर्यादीचे अपहरण करण्यासाठी महापौरांनी गुन्हेगाराला फोन करायला लावल्याचा दावा राष्ट्रवादीचे शहराध्यक्ष प्रशांत जगताप यांनी केला. यास प्रत्युत्तर देताना महापौरांनी जगताप यांनी बेजबाबदार वैयक्तीक टीका थांबवा, अन्यथा यापुढे तुमचीही प्रकरणे बाहेर काढू, त्याची किंमत मोजावी लागेल असा इशारा दिला.

सभागृहनेते गणेश बीडकर यांनी काल (गुरुवारी) केलेल्या आरोपांना उत्तर देण्यासाठी ‘भाजपचा गुन्हेगारीचा दुसरा अंक’ असे सांगत आज प्रशांत जगताप यांनी पत्रकार परिषद घेतली. त्यामध्ये भाजपवर गंभीर आरोप केल्याने हा वाद वैयक्तीक पातळीवर आल्याची चर्चा महापालिकेत सुरू आहे, त्यामुळे दोन्ही पक्षातील वाद तीव्र झाला आहे.

‘‘दत्तवाडी पोलिस ठाण्यात सदा ढावरेवर दाखवलेल्या अपहरणाच्या गुन्ह्‍याचे धागेदोरे थेट महापौरांपर्यंत येत आहेत. या पदाचा मान राखण्यासाठी गुन्हा दाखल होऊ नये असे वाटते. पण सदा ढावरेला कोणाकोणाचे फोन येत होते याचा सीडीआर काढावा, भाजपचे पदाधिकारी गुंडगिरी करायला लावून संघटित गुन्हेगारीत सहभागी आहेत.’’

- प्रशांत जगताप, शहराध्यक्ष, राष्ट्रवादी

‘‘प्रशांत जगताप यांना रोज आमच्या पक्षाच्या नेत्यांवर काहीतरी बोलायची सवय लागली आहे. त्यांनी स्वतःला सावरायला हवे. कोणत्याही प्रकरणात नाव घेताना त्याची सत्यता असावी, पुरावे असले पाहिजे. यापुढे त्यांचे चुकीचे बोलणे खपवून घेतले जाणार नाही. असेच वैयक्तीक आरोप करणार असाल तर याची किंमत मोजावी लागेल.’’

- मुरलीधर मोहोळ, महापौर

‘‘आमच्यावर झालेल्या आरोपांवर तपास यंत्रणा काम करतील,त्यास आम्ही तयार आहोत. भ्रष्टाचार केल्यानेच त्यांच्याच पक्षाच्या विरोधीपक्षनेत्यांचे पती शिक्षण मंडळाचे अध्यक्ष असताना लाच घेतल्याने जेलमध्ये गेले होते.’’

- गणेश बीडकर, सभागृहनेते

‘‘गुंडगिरीवर वरदहस्त ठेवणारे राजकीय पक्षच आता निवडणुकीच्या तोंडावर नुराकुस्ती खेळत आहेत. हे गुंडगिरीचे भूत पुणेकरांनी या निवडणुकीत उतरविण्यासाठी पुढे आले पाहिजे.’’

- मुकुंद किर्दत, शहराध्यक्ष, आप