Pune Crime : पोलिसांनी रचला सिनेस्टाईल सापळा; खंडणी मागणाऱ्याला 'अशी' केली अटक

पुणे - मागील काही दिवसांत पुण्यातील गुन्हेगारीमध्ये मोठ्या प्रमाणात वाढ झाली आहे. त्यामुळे पोलिस यंत्रणा ऍक्शन मोडमध्ये आली आहे. पोलिसांनी अत्यंत शिताफीने एकाला अटक केली आहे. पुण्यातील प्रसिद्ध चार्टर्ड अकाउंटंट यांना खंडणी मागणाऱ्या आरोपीला पोलिसांनी अटक केली. (Pune Crime News in Marathi)

पुण्यातील प्रसिद्ध चार्टर्ड अकाउंट सचिन संपतलाल पारेख यांच्या संपूर्ण कुटुंबाला जीवे मारून टाकण्याची धमकी देऊन 30 लाख रुपये खंडणी मागण्यात आली होती. त्यानंतर पोलिसांनी आरोपीला सिने स्टाईल सापळा रचून अटक केली.

मागील महिन्यापासून अज्ञात फोन नंबरवरून WhatsApp वर मेसेज येतात. तसेच पैसे मागून पैस न दिल्यास मुलांना आणि त्यांना जीवे मारण्याची वारंवार धमकी मिळत असल्याची तक्रार सचिन पारेख यांनी केली होती. त्यानंतर पुणे पोलिसांच्या पथकाने पुणे महापालिकेजवळ खंडणीमध्ये मागितलेली रक्कम घेऊन सापळा रचला. मात्र आरोपीला संशय आल्याने त्याने अनेक वेळा जागा बदलली.

दरम्यान आरोपीने गरवारे ब्रिज खाली झुडपात बॅग ठेवण्यासाठी सांगून निघून जाण्यास सांगितले. काही वेळात तिथे एक जण आला. परंतु, पोलिस दिसताच त्याने पळ काढला. मात्र पोलिसांनी पाठलाग करत त्याला पकडले. किरण रामदास बिरादार (२४) असे त्याचे नाव असून तो लातूर जिल्ह्यातील उदगीर तालुक्यातील आहे

आरोपीने आतापर्यंत ४ ते ५ प्रतिष्ठित व्यक्तींना खंडणी साठी फोन केल्याचे, तपासात निष्पन्न झाले आहे. पोलिसांकडून अधिक तपास सुरू आहे.