पुण्यात दहशत निर्माण करणाऱ्या रोशन लोखंडे टोळीविरुद्ध 'मोक्का', पोलिस आयुक्तांकडून कडक कारवाई

पुणे - सिंहगड रस्ता परिसरात नागरीकांना लुटण्याबरोबरच दहशत निर्माण केल्याप्रकरणी गुंड रोशन लोखंडे व त्याच्या साथीदारांविरुद्ध पोलिसांनी महाराष्ट्र संघटीत गुन्हेगारी प्रतिबंधक कायद्यानुसार (मोक्का) कारवाई केली आहे. संबंधित टोळीकडून नागरीकांना मोठ्या प्रमाणात त्रास दिला जात असल्याने पोलिस आयुक्त अमिताभ गुप्ता यांनी "मोक्का'नुसार कारवाईचा बडगा उगारला आहे.

रोशन दयानंद लोखंडे (वय 21, रा. मानाजीनगर, नऱ्हे), प्रसाद अर्जुन धावडे (वय 20, रा.नांदेडगाव), वैभव अरुण तिडके (वय 21, रा. मानाजीनगर, नऱ्हे), पवन सुग्रीव बिराजदार (वय 24, रा. नऱ्हेगाव), फैजल फिरोज काझी (वय 21, रा.नऱ्हे) अशी "मोक्का'नुसार कारवाई केलेल्या सराईत गुंडांची नावे आहेत. लोखंडे टोळीविरुद्ध नागरीकांना अडवून लुटमार करणे, कोयत्याचा धाक दाखवून जबरदस्तीने पैसे काढून घेणे, तडीपार आदेशाचा भंग करून कोयता, बनावट पिस्तुल घेऊन नाच करणे, खंडणी मागून पैसे उकळणे यासारखे गुन्हे दाखल आहेत. मुख्य आरोपी रोशन लोखंडे याच्या सांगण्यावरुन इतर आरोपींनी एकत्र येऊन हे गुन्हे केले आहेत.

- ताज्या बातम्यांसाठी डाऊनलोड करा ई-सकाळचे ऍप

- पुण्याच्या बातम्या वाचण्यासाठी येथे ► क्लिक करा

रोशन लोखंडेविरुद्ध 2016 पासून विविध प्रकारचे गुन्हे दाखल आहेत. त्यामुळे संबंधीत टोळीविरुद्ध 'मोक्का'नुसार कारवाई करण्याचा प्रस्ताव सिंहगड रस्ता पोलिस ठाण्याचे वरिष्ठ पोलिस निरीक्षक देविदास घेवारे यांनी पोलिस उपायुक्तांकडे पाठविला होता. त्यानंतर संबंधीत प्रस्तावास अपर पोलिस आयुक्त डॉ.संजय शिंदे यांनी मंजुरी दिली.

पुण्यातील गुंड बंडू आंदेकरच्या आवळल्या मुसक्या; वसुलीप्रकरणी साथीदारांसह गुन्हा दाखल

आत्तापर्यंत गुन्हेगारी टोळ्यांविरुद्ध 21 "मोक्का' कारवाई
शहरातील कायदा-सुव्यस्था बिघडविण्याचा प्रयत्न करणाऱ्या टोळ्यांविरुद्ध पोलिस आयुक्त अमिताभ गुप्ता व सहपोलिस आयुक्त डॉ.रविंद्र शिसवे यांनी कडक कारवाई करण्याची भुमिका घेतली आहे. त्यानुसार, गुप्ता यांनी पोलिस आयुक्तपदाचा कार्यभार स्विकारल्यापासून आत्तापर्यंत 21 मोक्का कारवाई केली आहे. या कारवाईमुळे गुन्हेगारी टोळ्यांबरोबरच सराईत गुन्हेगारांनाही चांगलीच जरब बसली आहे.

Edited By - Prashant Patil