निवडणूकीत नियमांचे उल्लंघन करणाऱ्यांवर कारवाई : पोलीस निरीक्षक मुजावर

इंदापूर : इंदापूर तालुक्यात आगामी काळात विविध निवडणूका होणार असून निवडणूकीत नियम भंग करणाऱ्यांवर कडक कारवाई केली जाईल असा सूचक इशारा इंदापूर पोलीस ठाण्याचे पोलीस निरीक्षक टी.वाय.मुजावर यांनी दिला.

इंदापूर पोलीस ठाण्याअंतर्गत दि. ९ डिसेंबर रोजी येथील शहा सांस्कृतिक भवन मध्ये तक्रार निवारण दिनाचे आयोजन करण्यात आले होते. यावेळी इंदापूर पोलिस ठाण्याचे पोलिस अधिकारी, बिट अंमलदार, पोलीस पाटील, महिला दक्षता कमिटीच्या सदस्यांना मार्गदर्शन करताना ते बोलत होते. यावेळी तक्रारदारांच्या सूचना निवारण करण्यासाठी सर्वांनी योग्य काळजी घ्यावी अश्या सूचना त्यांनी दिल्या.

श्री. मुजावर पुढे म्हणाले,इंदापूर तालुक्यात सध्या पुणे जिल्हा मध्यवर्ती बँकनिवडणूकीची रणधुमाळी सुरू असून आगामी काळात नगर परिषद, पंचायत समिती व जिल्हा परिषद या निवडणूका होणार आहेत. निवडणूक कालावधीत गुन्हे करणाऱ्यांची गय केली जाणार नाही.

यावेळी सहाय्यक पोलीस निरीक्षक ज्ञानेश्वर धनवे यांनी गावागावांतील बँक, सराफकट्टा यांची सुरक्षा, महिला व शिक्षण घेणाऱ्या मुली विषयी होणारे अपराध व त्याविषयी घ्यावयाची दक्षता तर सहाय्यक पोलीस निरीक्षक नागनाथ पाटील यांनी गावागावात शांतता व सलोखा, कोरोना महामारीचे निर्बंध यासंदर्भात मार्गदर्शन केले. सुत्रसंचलन पवन भोईटे यांनी केले.