मार्केट यार्डात शुकशुकाट

मार्केट यार्ड, ता. २९ : उपमुख्यमंत्री अजित पवार यांच्या निधनामुळे पुणे मार्केट यार्ड परिसरात व्यापारी, शेतकरी आणि बाजाराशी संबंधित घटकांनी तीव्र दुःख व्यक्त करत बुधवारी व गुरुवारी मार्केट यार्डमधील सर्व व्यवहार बंद ठेवण्यात आले होते.
दि पूना मर्चंट्स चेंबर, हमाल पंचायत आणि ट्रान्स्पोर्ट असोसिएशन, अडते असोसिएशन आदी संघटनांनी संपूर्ण बाजार बंद पाळला. तसेच कृषी उत्पन्न बाजार समिती पुणेच्या मुख्य बाजार आवारातील फळे-भाजीपाला विभाग, पान बाजार, केळी बाजार, गुरांचा बाजार, फुलांचा बाजार, भुईकाटा केंद्र, पेट्रोल पंप विभाग तसेच मोशी, उत्तमनगर, मांजरी आणि खडकी येथील उपबाजारही बंद होते. बुधवारी बाजार समितीचे मुख्य कार्यालयदेखील बंद ठेवण्यात आले होते.

आज पुणे मार्केट यार्ड पूर्ववत
पुणे कृषी उत्पन्न बाजार समितीच्या मुख्य बाजार आवारातील सर्व व्यवहार शुक्रवारी (ता. ३०) पूर्ववत होणार आहेत. फळे-भाजीपाला विभाग, पान बाजार, केळी बाजार, गुरांचा बाजार, फुलांचा बाजार, भुईकाटा केंद्र तसेच पेट्रोल पंप विभागातील व्यवहार नियमित वेळेत सुरू होणार आहेत. यासोबतच मोशी, उत्तमनगर, मांजरी आणि खडकी येथील उपबाजारांमधील व्यवहारही नेहमीप्रमाणे सुरू राहणार आहेत.