पुणे : दुधाला प्रतिलिटर १ रुपया बोनस

पुणे : जिल्ह्यातील दूध उत्पादक शेतकऱ्यांना प्रतिलिटर १ रुपयाप्रमाणे बोनस (फरक) देण्याची घोषणा जिल्हा दूध उत्पादक सहकारी संघाने (कात्रज डेअरी) गुरुवारी (ता.२३) झालेल्या वार्षिक सर्वसाधारण सभेत केली. या घोषणेनुसार शेतकऱ्यांना यंदाच्या दिवाळीत ७ कोटी ९० लाख रुपयांचे बोनस वाटप केले जाणार आहे. कोरोना संसर्गाच्या काळातही कात्रज डेअरीला २ कोटी ४९ लाख ४ हजार ३७५ रुपयांचा निव्वळ नफा झाल्याचे या दूध संघाचे अध्यक्ष विष्णू हिंगे यांनी यावेळी सांगितले.

कोरोना संसर्गाच्या पार्श्‍वभूमीवर ही सभा आॅनलाइन घेण्यात आली. या सभेला सर्व संचालक मंडळ उपस्थित होते. मार्च २०२१ अखेरपर्यंत संघाच्या ५८.३९ लाख रुपयांच्या ठेवी झाल्या असून या ठेवींमध्ये गतवर्षीच्या तुलनेत १३ कोटी १९ लाख रुपयांनी वाढ झाली आहे. शिवाय बॅंकेतील ठेवींवरील व्याजदर कमी होऊनही दूध संस्थांच्या त्यांच्या शेअर्सवर १५ टक्के लांभाश मिळणार आहे. यानुसार सर्व संस्थांना मिळून १ कोटी ४ लाख रुपयांचा लाभांश मिळणार असल्याचे हिंगे यांनी यावेळी स्पष्ट केले. या सभेला जिल्ह्यातील ६४४ दूध संस्थांचे प्रतिनिधी उपस्थित होते.

दरम्यान, दूध आणि दुग्धजन्य पदार्थांच्या विक्रीत वाढ करण्यासाठी पुणे शहर व ग्रामीण भागात मिळून २५२ आधुनिक मिल्क पार्लर सुरू केली आहेत. तसेच मुंबई, नाशिक, सोलापूर, कोल्हापूर, सातारा, महाबळेश्‍वर आदी शहरासाठी नव्याने वितरण मार्ग सुरु केले आहेत.

गणेशोत्सवात २५ टन मोदकांची विक्री

कात्रज डेअरीने यंदाच्या गणेशोत्सवात मोदक आणि पेढ्यांचा पुरवठा मोठ्या प्रमाणात करण्याचा निर्णय घेतला होता. त्यानुसार तो करण्यात आला. यंदाच्या गणेशोत्सवात फक्त कात्रज डेअरीचे २५ टन मोदक व पेढे विक्री झाले आहेत. या मोदकांच्या विक्रीतून संघाला एक कोटी रुपये मिळाले आहेत.

‘अक्रियाशील सभासदांना मतदानाचा अधिकार नको’

जिल्हा दूध संघाच्या अक्रियाशील सभासदांना संचालक मंडळाच्या पंचवार्षिक निवडणुकीत मतदानाचा अधिकार जेऊ नये. या सभासदांना मतदानाचा हक्क मिळू नये, यासाठी जिल्हा दूध संघाने न्यायालयात जावे, असा ठराव सर्व क्रियाशील दूध संस्थांच्या प्रतिनिधींनी मांडला. हा ठराव सर्वानुमते मंजूर करण्यात आला.