पुणे : पुणे महापालिकेच्या प्रशासनाने ‘आदर्श शाळा’ प्रकल्पात आणखी ३० शाळांचा समावेश केला आहे. त्यामुळे डिसेंबरपर्यंत एकूण ४५ शाळांमध्ये या प्रकल्पाची अंमलबजावणी होणार आहे. विद्यार्थ्यांची गुणवत्तावाढ व सर्वांगीण विकासाबरोबरच महापालिका शाळांचाही कायापालट करण्यासाठी अतिरिक्त आयुक्त विकास ढाकणे यांच्या संकल्पनेतून मागील वर्षापासून हा प्रकल्प सुरू करण्यात आला. पहिल्या टप्प्यात १५ शाळांचा समावेश झाला. हडपसर, मुंढवा, रामटेकडी, नगर रस्ता, बिबवेवाडी, सहकारनगर, कात्रज, सिंहगड रस्ता, कोथरूड, येरवडा अशा वेगवेगळ्या भागांतील शाळा यात आहेत.
दुसऱ्या टप्प्यात गोखलेनगर, वारजे, येवलेवाडी, कोंढवा बुद्रुक, कोथरूड, महंमदवाडी या भागांमधील १५ शाळांचा समावेश झाला. त्यानंतर तिसऱ्या टप्प्यात आणखी १५ शाळांची भर घालण्यात आली.
‘आदर्श शाळे’ची वैशिष्ट्ये
इमारतींची आकर्षक रंगरंगोटी
शालेय अभ्यासक्रमानुसार ‘बाला पेटिंग’ला प्राधान्य
विद्यार्थ्यांना ई-लर्निंगसह अद्ययावत तंत्रज्ञानाद्वारे शिक्षण देणे
विद्यार्थ्यांची उत्तम बैठक व्यवस्था
बागकामापासून खतनिर्मितीचे प्रशिक्षण
खासगी शाळांच्या धर्तीवर अद्ययावत सोयीसुविधा
विद्यार्थ्यांना प्रवासासाठी बसची सुविधा
विद्यार्थ्यांसाठी होणारे प्रयत्न
शाळेच्या वेळेव्यतिरिक्त रोज दोन तास तसेच रविवारीही मार्गदर्शन
वैशिष्ट्यपूर्ण अध्यापन
शिष्यवृत्ती, स्पर्धा परीक्षांसाठी खास तयारी करणे
अभ्यासासह कला व क्रीडा क्षेत्रातील विविध स्पर्धांसाठी तयारी करणे
व्यक्तिमत्त्व विकासासाठी स्काउट गाइड
राष्ट्रीय सेवा योजना (एनसीसी)
‘आदर्श शाळा’ प्रकल्पामुळे महापालिकेच्या शाळांसाठीच्या निधीमध्ये वाढ झाली. त्यामुळे भौतिक सोयीसुविधा वाढल्या. त्याचबरोबर विद्यार्थ्यांच्या गुणवत्तावाढीबरोबरच कला व क्रीडासह सर्वांगीण विकासासाठी प्रयत्न केले जात आहेत. त्यामुळे पालकांची मानसिकता बदलत आहे. ते खासगी शाळांऐवजी मुलांना महापालिकेच्या शाळेत घालत आहेत.
- अंकुश माने, शिक्षक, महापालिका शाळा
गेल्या वर्षी १५ शाळांपासून प्रकल्प सुरू झाला. त्यानंतर आणखी दोन टप्प्यांत ३० शाळांचा समावेश केला आहे. यामुळे विद्यार्थ्यांच्या गुणवत्ता, व्यक्तिमत्त्व विकासात आमूलाग्र बदल होत आहे, त्याच पद्धतीने महापालिकेच्या शाळांचा चेहराही बदलत आहे.
- विकास ढाकणे, अतिरिक्त आयुक्त, पुणे महापालिका
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.
