Pune Road News : कर भरूनही जीवघेणे रस्ते ; महापालिकेचे दुरुस्तीकडे दुर्लक्ष,फटींमुळे चालकांची कसरत

पुणे : दांडेकर पूल चौकातून धायरीच्या दिशेने जाताना महिलेच्या दुचाकीचे चाक रस्त्यावरील फटीत गेले. दुचाकी घसरून दुभाजकाला धडकली. त्याचवेळी तेथून जाणारा ट्रक महिलेच्या अंगावरून गेला आणि महिलेचा देह निपचित पडला, ही घटना नुकतीच घडली. ‘‘आम्ही प्रामाणिकपणे कर भरतो, तरीही किती जीव जाण्याची वाट महापालिका प्रशासन बघणार आहे,’’ असा प्रश्‍न आता नागरिक विचारू लागले आहेत.

शहरातील नरवीर तानाजी मालुसरे रस्ता (सिंहगड रस्ता), स्वारगेटहून हडपसरकडे जाणारा सोलापूर रस्ता, खडकी रेल्वे स्थानकाजवळील जुना पुणे-मुंबई महामार्ग, गणेशखिंड रस्ता, सातारा रस्ता, कर्वे रस्ता, नगर रस्ता, विश्रांतवाडी, आळंदी रस्ता अशा काही प्रमुख रस्त्यांसह अन्य रस्त्यांमध्ये धोकादायक फटी पडल्या आहेत.

शहराच्या कोणत्याही भागातील रस्ते सलग नाहीत. बहुतांश ठिकाणी सिमेंटच्या रस्त्यांना जोडणाऱ्या जागेतील डांबर किंवा सिमेंट निघून गेले आहे. त्यामुळे तेथे भेगा आणि खड्डे तयार झाले आहेत. त्यात दुचाकीचे चाक गेल्याने चालकांचे वाहनावरील नियंत्रण सुटून अपघात होत आहेत. काही घटनांमध्ये दुचाकीस्वारांना प्राण गमवावा लागला आहे. असे असताना केवळ भरधाव दुचाकी घसरून चालकाचा मृत्यू, अशी पोलिस दफ्तरी नोंद केली जाते. परंतु, संबंधित अपघात हा रस्त्यांमधील फटी, खड्डे न बुजविल्यामुळे झाली असल्याची कुठेही नोंद होत नाही, हे वास्तव आहे.

काय आहे परिस्थिती

• सिंहगड रस्त्यावर काँक्रीटचा रस्ता संपतो, त्या ठिकाणचे सिमेंट/डांबर जाऊन खड्डे

• वडगाव पुलापासून महालक्ष्मी मंदिरापर्यंत, हिंगणे, रेसकोर्स व लष्कर परिसरातील रस्त्यांवर जीवघेण्या फटी

• रस्ते एकसलग नाही, उंची समांतर नाही, मोठमोठे खड्डे

• दुभाजक तुटक्‍या अवस्थेत

दांडेकर पुलाजवळील रस्त्यावर फटीत दुचाकी गेल्याने माझ्या मैत्रिणीचा जीव गेला. मी स्वतः तीन वेळा या फटींमुळे पडून जखमी झालो. अशी वेळ कोणावरही येऊ नये, यासाठी महापालिकेच्या संकेतस्थळावर तक्रारी नोंदविल्या. पण त्याकडे दुर्लक्ष केले जाते.

- धनंजय देशमुख, वैज्ञानिक

सिंहगड रस्त्यावर सिमेंट निघून तेथे फटी पडल्या आहेत. हा प्रश्‍न गंभीर असून, सिमेंट किंवा डांबर टाकून फटी तत्काळ भरून घेण्याच्या सूचना पथ विभागाला दिल्या आहेत. यांसह इतर रस्त्यांवरील कामेही लवकरच पूर्ण केली जातील.

- अनिरुद्ध पावसकर,

प्रमुख, पथ विभाग, महापालिका