महापालिकेच्या चहापाण्यावर सव्वातीन लाखांचा खर्च

पुणे, ता. १९ ः पुणे महापालिकेतील विषय समित्यांच्या बैठकांसाठी चहा व अन्य खाद्यपदार्थ पुरविले जातात. पण निविदेविना याचे बिल मंजूर केले जात आहे. आतापर्यंत तीन लाख २० हजार रुपयांचा खर्च झाल्याचे माहिती अधिकार कायद्यातून समोर आले आहे.
माहिती अधिकार फोरमचे सदस्य उमेश नाईक यांनी माहिती अधिकारातून ही माहिती मागवली होती. ही माहिती नगरसचिव विभागाने दिली आहे. यामध्ये सर्वाधिक खर्च हा स्थायी समितीच्या बैठकीत झाला आहे. दोन लाख ७० हजार १४० रुपयांचा चहा स्थायी समितीच्या बैठकीत प्यायल्याचे माहितीतून समोर आले आहे. त्या खालोखाल नाव समितीचा खर्च १५ हजार ७१६ रुपये, विधी समितीचा खर्च १४ हजार १३४ रुपये, शहर सुधारणा समितीचा खर्च १० हजार २४८ रुपये आणि महिला व बाल कल्याण समितीच्या बैठकीत आठ हजार ७८८ रुपयांचा चहा प्यायल्याची माहिती देण्यात आली. क्रीडा समितीच्या बैठकीच्या चहाचे बिल मात्र केवळ ४२० रुपये इतके झाले आहे. महापालिकेत प्रत्येक गोष्टीसाठी निविदा काढली जाते किंवा कोटेशन घेऊन खर्च केला जातो. पण चहापाण्याच्या खर्चासाठी कोणतीही प्रक्रिया पार पाडली जात नाही. चहा पुरवठा करणाऱ्या हॉटेलचालकांच्या बिलांचा आणि प्रत्यक्षात आलेल्या चहाचा मेळ घातला जात नाही, थेट बिल काढून पैसे दिले जातात. या प्रक्रियेत पारदर्शकता आणावी, अशी मागणी नाईक यांनी केली.