Pune News : लिफ्टमधे अडकलेल्या लहान मुलाची अग्निशमन दलाकडून सुखरुप सुटका

कँटोन्मेंट - लिफ्टमधे अडकलेल्या लहान मुलाची अग्निशमन दलाकडून सुखरुप सुटका करण्यात आली. भवानी पेठ, गुरूनानक नगर, अर्बन सॉलिटियर येथे इमारतीत पहिल्या मजल्यावर लिफ्ट अचानक बंद पडल्याने एक सात वर्षाचा मुलगा अडकला होता.

यावेळी कुटुंबीयांनी २३ सप्टेंबर रोजी राञी ०९•०५ वाजता अग्निशमन दलाच्या नियंत्रण कक्षात संपर्क करताच 10 मिनिटात जवान घटनास्थळी दाखल झाले. लिफ्टच्या दरवाजा खुलत नसल्याने मुलगा भेदरलेल्या अवस्थेत होता. सतत त्याच्या आईला हाक देत होता.

यावेळी आईचा जीव ही कासावीस झाला होता. यावेळी जवानांनी मुलाला आवाज देत त्याच्याशी संवाद सुरू ठेवत लिफ्ट रुममधे जाऊन तांञिकरित्या कार्य पार पाडत लिफ्ट पहिल्या मजल्यावर समांतर घेण्यात आली. तसेच दलाकडील स्प्रेडरचा वापर करुन लिफ्टचा दरवाजा उघडत लहान मुलाची सुमारे वीस मिनिटांनी सुखरुप सुटका केली.

सुटका होताच तेथील रहिवाशांनी जवानांचे आभार मानले. या कामगिरीत अग्निशमन नियंत्रण कक्ष अधिकारी पंकज जगताप, वाहनचालक अतुल मोहिते, प्रशांत मखरे, तांडेल मंगेश मिळवणे व फायरमन चंद्रकांत गावडे, सुधीर नवले, ओंकार बोंबले, अमर दिघे, केतन नरके यांनी सहभाग घेतला.