Pune News : मुस्लिम बांधवांकडून इस्त्राइलकडून पॅलेस्टाईनवर होणाऱ्या हवाई हल्ल्यांचा निषेध; मराठा आरक्षणाला पाठिंबा.

मंचर - इस्राईल देशाकडून सतत गाझापट्टी-फिलिस्तीनवर हवाई हल्ले होत आहेत. निष्पाप लोकांचे बळी जात आहेत. तेथील नागरिक भयभीत झाले आहेत. मंचर (ता.आंबेगाव) शहरात मुस्लिम बांधवांनी मोर्चा काढून इस्राईलच्या हुकुमशाही वृत्तीचा निषेध व्यक्त केला. यावेळी मुस्लीम बांधवांच्या भावना तीव्र होता. यावेळी भारताचा तिरंगा हातात घेऊन ‘छत्रपती शिवाजी महाराज की जय’ अश्या घोषणा देण्यात आल्या.

जुम्मा मज्जीद-मारुती मंदिर चौकापासून बाजारपेठ मार्गे छत्रपती शिवाजी महाराज चौकात मोर्चा आला.तेथे झालेल्या निषेध सभेत मुस्लीम समाजाचे नेते राजू इनामदार म्हणाले “अंतराष्ट्रीय कराराचा भंग पायदळी तुडविण्याचे काम इस्राईल करत आहे.सतत रुग्णालये व सर्वाजानिक ठिकाणी बॉम्ब हल्ले केले जातात.हा प्रकार ताबडतोब थांबविण्याची गरज आहे.”

मोर्चाचे नेतृत्व हाजी मन्सूर पठाण, अल्लु इनामदार,रहेबर मीर,इरफान काझी, मौलाना वसीम जयदी,अमानत मीर, मन्सूर शेख, हैदर मिर्झा, अली हसन इनामदार आदींनी केले. मोर्चात मोठा जनसमुदाय सहभागी झाला होता. त्यामध्ये तरुणांची संख्या लक्षणीय होती. मुस्लिम बांधवांच्या हातात निषेधाचे फलक होते. यावेळी जोरदार घोषणा देण्यात आल्या. मराठा आरक्षण आंदोलनाला मुस्लिम बांधवांचा पाठिंबा असल्याचे यावेळी राजू इनामदार यांनी जाहीर केले.