Tree Collapse : पुणे-पानशेत रस्त्यावर झाड कोसळल्याने वाहतुक ठप्प; स्थानिक व पर्यटक अडकले

सिंहगड - पुणे-पानशेत रस्त्यावरील सोनापूर (ता. हवेली) गावच्या हद्दीत पाऊस व वाऱ्यामुळे मोठे झाड कोसळल्याने दोन्ही बाजूंची वाहतूक पूर्णपणे ठप्प झाली आहे. सुदैवाने यात कोणीही जखमी झालेले नाही. दरम्यान पुणे महानगर प्रदेश विकास प्राधिकरणाच्या नांदेड सिटी अग्निशमन केंद्राचे जवान झाड हटविण्यासाठी घटनास्थळाकडे रवाना झाले आहेत.

सायंकाळी साडेपाच वाजण्याच्या सुमारास पाऊस व वाऱ्यामुळे मोठे झाड रस्त्यावर आडवे पडले आहे. ज्या ठिकाणी झाड पडले तेथे एका बाजूला डोंगर व दुसऱ्या बाजूला खडकवासला धरणाचे पाणलोट क्षेत्र आहे. त्यामुळे या ठिकाणी पर्यायी रस्ता नसल्याने पर्यटक व स्थानिक नागरिकांची वाहने दोन्ही बाजूंना अडकून पडली आहे.

याबाबत माहिती मिळताच पीएमआरडीचे विभागीय अग्निशमन अधिकारी सुजित पाटील यांच्या मार्गदर्शनाखाली महेश घटमाळ, शुभम मिरगुंडे, विशाल घोडे, भाऊसाहेब आव्हाड व अतुल रोकडे हे जवान झाड हटविण्यासाठी रवाना झाले आहेत.