रक्ताने ‘सॉरी मॉम’ लिहून पुणे पोलिसाची आत्महत्या

राजगड पोलिस ठाण्यात कार्यरत असलेला तरुण पोलिस शिपाई रज्जाक महंमद मणेरी (वय २४, मूळगाव बावडा, ता. इंदापूर) यांनी सध्या राहत असलेल्या किकवी (ता. भोर) येथील त्यांच्या घरामध्ये आत्महत्या केली.

याबाबत रज्जाक यांचे वडील व निवृत्त पोलिस कर्मचारी महंमद मणेरी यांनी राजगड पोलिस ठाण्यात खबर दिली आहे. रज्जाक हे गेल्या सहा महिन्यांपासून राजगड पोलिस ठाण्यात कार्यरत होते. सोमवार (ता. २१) रात्रीपासून ते फोन उचलत नव्हते. त्यामुळे त्यांचे वडील व नातेवाईक किकवी येथे आले. त्यावेळी रज्जाक यांच्या घराचा दरवाजा आतून बंद होता. त्यामुळे त्यांनी खिडकीतून काठीच्या सहाय्याने दरवाजा उघडला असता रज्जाक हे मृतावस्थेत आढळून आले. त्यांनी हाताची नस कापून घेऊन नंतर गळफास घेतल्याचे दिसले. मात्र, गळफास तुटून ते जमिनीवर पडले होते. घरातील फरशीवर रक्ताने ‘मॉम आय एम सॉरी’ असे लिहीले होते.

दरम्यान, ही घटना समजताच वरिष्ठ पोलिस अधिकाऱ्यांसह राजगड पोलिस निरीक्षक संदिप घोरपडे यांनी घटनास्थळी धाव घेतली. पोलिस सहकाऱ्यांना या घटनेचा मोठ्ठा धक्का बसला. कामात अत्यंत हुशार व तडफदार असलेल्या रज्जाक यांनी असे काही केले आहे, यावर कोणाचा विश्वास बसत नव्हता.