

Farmers in Pune district face water scarcity and delayed Rabi sowing.
esakal
पुणे, : ‘‘पावसाळा संपला, पण जमिनीत ओलावा नाही. विहिरींचे पाणीही कमी झाले आहे. अशा परिस्थितीत रब्बीची पेरणी करायची तरी कशी? केली, तरी पिकाला पाणी कुठून द्यायचे?’’ असा सवाल शिरूर येथील महिला शेतकरी सारिका इंगळे करतात. त्यांची ही व्यथा सध्या जिल्ह्यातील अनेक शेतकऱ्यांची झाली आहे.
जिल्ह्यात सध्या सिंचनासाठीही पुरेसे पाणी उपलब्ध नाही. त्यामुळे रब्बीच्या पेरणीवर दुष्काळाचे सावट गडद झाले आहे. जिल्ह्यात आतापर्यंत अवघी ३५ हजार ६६० हेक्टरवर पेरणी झाली असून गतवर्षीच्या तुलनेत ३७ हजार ९८४ हेक्टरने पेरा घटला आहे. सर्वसाधारण क्षेत्राच्या केवळ १९ टक्के पेरणी झाल्याने यंदा रब्बीचे क्षेत्र आणि उत्पादन या दोन्हींबाबत चिंता वाढली आहे.