Video : बोट दाखवेल तिथे 'बोट' सेवा; राष्ट्रवादीच्या पुण्यातील आंदोलनानं लक्ष वेधलं

NCP Protest In front Of PMC : पुणेकरांना गेल्या काही दिवसांपासून पावसाने अक्षरक्षः झोडपून काढलं आहे. यामुळे ठिकठिकाणी नागरिकांना वाहतूक कोंडीचा सामना करावा लागत आहे. या सर्वांमध्ये राष्ट्रवादी पक्षातर्फे पुणे महापालिकेसमोर करण्यात आलेल्या उपहासात्मक मागणीच्या आंदोलनाची सध्या शहरात जोरदार चर्चा सुरू आहे. राष्ट्रवादीतर्फे करण्यात आलेले हे आंदोलन भर पावसात करण्यात आले. यावेळी पक्षाच्या कार्यकर्त्यांनी थेट खरीखुरी बोटचं आणली होती.

त्याचे झाले असे की, रविवारी पुणे शहरात पावसाने जोरदार बॅटिंग केली. यामुळे शहरातील अनेक भागांसह रस्त्यारस्त्यांवर मोठ्या प्रमाणात पाणी साठले होते. यामुळे मोठ्या प्रमाणात वाहतूक कोंडी झाली होती. याच गोष्टीकडे लक्ष वेधण्यासाठी आणि शहरात दिवसेंदिवस वाढणाऱ्या पाणी तुंबण्याच्या समस्येवर लक्ष वेधण्यासाठी राष्ट्रवादीतर्फे आज महापालिकेसमोर बोट आणत अनोखे आंदोलन करण्यात आले.

यावेळी या समस्येतून सामान्या नागरिकांची सुटका व्हावी याकरता बोट दाखवेल तेथे बोटसेवा सुरू झालीच पाहिजे अशी उपहासात्मक मागणी करण्यात आली. तसेच पुढील काळात सार्वजनिक वाहतूकीसाठी बोटीचा पर्याय उपलब्ध करुन देण्याचीही मागणी करण्यात आली. आंदोलनासाठी पक्षाकडून खरीखुरी बोट आणण्यात आल्याने सध्या शहरभर या अनोख्या आंदोलनाची जोरदार चर्चा सुरू आहे. राष्ट्रवादीच्या या अनोख्या आंदोलनानंतरतरी प्रशासनाला जाग येणार का? आणि पाणी तुंबण्याच्या समस्येवर ठोस अशी उपाययोजना केली जाणार का? हे पाहणे महत्त्वाचे ठरणार आहे.