Pune Rains : होते सात, म्हणून वाचले १५०

मार्केट यार्ड - रात्रीच्या सुमारास सुरू झालेल्या मुसळधार पावसाने शहरात ठिकठिकाणी मोठ्या प्रमाणावर पाणी साचले होते. ही पाणी पातळी वाढल्याने सहकारनगर भागातील अनेक सोसायट्यांमध्ये पाणी घुसले होते. पावसाच्या जोरामुळे काही लोक आपल्या घरांमध्ये अडकले होते. हे लक्षात घेऊन आम्ही सात जणांनी स्वतःची बचावकार्य टीम तयार केली आणि स्थानिक रहिवाशांपैकी काहींना घेतले. या टीमने तातडीने या परिसरातील अरणेश्वर, टांगेवाली कॉलनीच्या मागच्या बाजूला असणाऱ्या वसाहतीतील १२५ ते १५० लोकांना वाचविण्याचे काम पूर्ण केले. त्यामुळे परिसरात ‘होते ७ म्हणून वाचले १५०’ अशी चर्चा आहे.

या टीममध्ये असणाऱ्या वसीम शेख याने ही घटना सांगितली. तो म्हणाला, रात्री दहाच्या सुमारास आम्हाला समजले की, अरणेश्वर, टांगेवाली कॉलनी आणि गंगा तीर्थ कॉलनीच्या मागच्या बाजूला असणाऱ्या वसाहतीत अनेक लोक अडकून पडले आहेत. त्यानंतर आम्ही त्यांना रेस्क्‍यू करून बाहेर काढायचे ठरवले. पण पावसाचा वेळ सरत नव्हता, पाऊस सतत कोसळत असल्यामुळे आम्ही हाताला येईल त्याचा आधार घेत ढोलची दोरी, शिडी आणि तिथे असणाऱ्या साड्यांचा आधार घेतला व त्या वसाहतीतील लोकांना वाचविले. या नैसर्गिक आपत्तीच्या वेळी स्थानिक नागरिकांनी आम्हाला मोठ्या प्रमाणावर मदत केल्यामुळे एकमेकांचा आधार घेऊन आम्ही दीडशे जणांना वाचवण्यात यशस्वी झालो. या रेस्क्‍यू टीममध्ये वसीम शेख, गौरव मोरे, सुलतान मुजावर, अभिलाष मोरे, चंदन कुंबरे, विकी खेतकर हे होते.