Driving Licence : नियमांचे उल्लंघन करताय, मग वाहन परवाना सांभाळा!

पुणे - वाहन चालविताना मोबाईलवर बोलत आहात... सिग्नलचे उल्लंघन, मद्य सेवन करून किंवा वेगाने वाहन चालवत असाल तर अपघाताची शक्यता आहेच. पण आता तुमचा वाहन परवानाही निलंबित होणार आहे. वाहतूक पोलिसांनी प्रादेशिक परिवहन विभागाच्या (आरटीओ) मदतीने ६९८ वाहनचालकांचे परवाने तीन महिन्यांसाठी निलंबित केले आहेत.

शहरात वाहतुकीचे नियम मोडणाऱ्या वाहनचालकांवरील दंडाची रक्कम काही कोटींवर पोचली आहे. वाहतूक पोलिसांनी यावर्षी जानेवारी ते ऑगस्ट या कालावधीत सहा लाख ९९ हजार ८७९ वाहनचालकांना सुमारे ४४ कोटींचा दंड आकारला आहे. गतवर्षीच्या तुलनेत हा आकडा कमी आहे.

परंतु या आकडेवारीवरून अनेक वाहनचालक नियमांकडे दुर्लक्ष करीत असल्याचे दिसून येत आहे. दुचाकीवर मान वाकडी करून मोबाईलवर बोलणे, सिग्नलचे उल्लंघन, भरधाव वाहन चालविणे आणि विरुद्ध दिशेने वाहन चालविणाऱ्या वाहनचालकांमुळे अपघात होत आहेत. अशा बेशिस्त वाहनचालकांचा परवाना निलंबित करण्याची शिफारस वाहतूक शाखेकडून आरटीओ विभागाकडे केली जाते. त्यानुसार आरटीओकडून ही कारवाई करण्यात आली.

वाहतूक नियमाचे उल्लंघन, वाहन परवाना रद्द केलेले चालक

(एक जानेवारी ते ८ सप्टेंबर २०२३) -

- ट्रिपल सीट ३४

- वाहन चालविताना मोबाईलवर बोलणे - २२४

- सिग्नलचे उल्लंघन - २०५

- वेगाने वाहन चालविणे - ६७

- मद्य सेवन करून वाहन चालवणे - ६४

- धोकादायक पद्धतीने वाहन चालवणे - १००

- अवैध प्रवासी वाहतूक - ४

बहुतांश अपघात वाहतुकीच्या नियमांचे उल्लंघन केल्यामुळे होत आहेत. स्वत:चा आणि इतर निष्पाप नागरिकांचा जीव धोक्यात घालणाऱ्या वाहनचालकांचा परवाना तीन महिन्यांसाठी निलंबित करण्यात येत आहे. त्यानंतरही पुन्हा नियमाचे उल्लंघन केल्यास संबंधित वाहनचालकांवर कठोर कायदेशीर कारवाई केली जाईल.

- विजयकुमार मगर, पोलिस उपायुक्त, पुणे शहर वाहतूक शाखा.