Crime : दवाखान्याचा खर्च परवडत नसल्यामुळे वडिलांकडून मुलाचा खून

पुणे - दवाखान्यातील उपचाराचा खर्च परवडत नसल्यामुळे वडिलाने आजारी मुलाचा गळा आवळून खून केल्याची धक्कादायक घटना हडपसर काळेपडळ परिसरात गुरुवारी (ता. १३) मध्यरात्री घडली. हडपसर पोलिसांनी वडिलाला अटक केली आहे.

अभिजित बाबूराव जायभाय (वय २८) असे खून झालेल्या तरुणाचे नाव आहे. याबाबत आई सुनीता बाबूराव जायभाय (वय ४५) यांनी हडपसर पोलिस ठाण्यात फिर्याद दिली आहे. त्यानुसार पोलिसांनी बाबूराव दिनकर जायभाय (वय ५०, रा. केतकेश्वर कॉलनी, काळेपडळ, तुकाई टेकडी, हडपसर) याच्याविरुद्ध गुन्हा दाखल केला आहे.

पोलिसांनी दिलेल्या माहितीनुसार, अभिजित जायभाय याला सहा महिन्यांपूर्वी डोक्याला गंभीर दुखापत झाली होती. त्यामुळे त्याला कोणतेही काम करता येत नव्हते. तो बेडवरच झोपून असायचा. त्याची आई सुनीता ही घरकाम करून कुटुंबाचा उदरनिर्वाह चालवते. तर, वडील बाबूराव जायभाय हा हमालीचे काम करतो. बाबूराव याला दारुचे व्यसन असून, तो घरखर्चासाठी पैसे देत नव्हता.

आजारी मुलाला ‘तुझा जगून काही उपयोग नाही. काही कामधंदा करीत नाही’, असे तो वारंवार बोलत असे. दवाखान्यातील उपचाराचा खर्च वाढत असल्याचा राग मनात धरून वडिलाने मध्यरात्री साडेबारा वाजण्याच्या सुमारास मुलाचा गळा आवळून खून केला. याबाबत मुलाच्या आईने हडपसर पोलिस ठाण्यात तक्रार दिली. पुढील तपास पोलिस निरीक्षक (गुन्हे) विश्वास डगळे करीत आहेत.