पर्यटकांचा ओढा ‘एमटीडीसी’च्या रिसॉर्टकडे

पुणे : उन्हाळ्यात थंड हवेच्या ठिकाणी निसर्गरम्य वातावरणात फिरण्याची मजा औरच! त्यात सरकारी कार्यालयांना सलग सुट्या...त्यामुळे पर्यटकांची पावले थंड हवेच्या ठिकाणी, समुद्रकिनारी वळू लागली आहेत. अशा रम्य ठिकाणी असलेल्या ‘एमटीडीसी’च्या रिसॉर्टस॒नाही पर्यटकांकडून पसंती दिली जात आहे.

महाराष्ट्र राज्य पर्यटन विकास महामंडळाची (एमटीडीसी) पुणे विभागातील महाबळेश्वर, माथेरान, पानशेत, माळशेज घाट, लोणावळा कार्ला, कोयनानगर, भीमाशंकर या सात रिसॉर्टस॒कडे पर्यटकांचा ओढा दिसून येत आहे. सिंहगड आणि अक्कलकोट येथील रिसॉर्टही येत्या १५ दिवसांनंतर पर्यटकांसाठी खुली होणार आहेत.

‘एमटीडीसी’चे रिसॉर्ट हे बहुतांश निसर्गरम्य ठिकाणी हिल स्टेशन आणि समुद्रकिनारी आहेत. प्रत्येक रिसॉर्टवर उपाहारगृहाची सुविधा, कृत्रिम रंग न वापरता चांगल्या दर्जाचे जेवण उपलब्ध करून दिले जाते. सैन्यदलात कार्यरत सैनिक आणि सेवानिवृत्त सैनिकांसाठी रिसॉर्टवर राहण्यासाठी २० टक्के आणि सरकारी अधिकारी, कर्मचाऱ्यांसाठी दहा टक्के सवलत देण्यात आली आहे. ज्येष्ठ नागरिकांसाठी सोमवार ते गुरुवारपर्यंत २० टक्के सवलत देण्यात येत आहे, अशी माहिती ‘एमटीडीसी’च्या पुणे विभागाचे प्रादेशिक अधिकारी दीपक हरणे यांनी दिली.

पुणे विभागातील ‘एमटीडीसी’चे रिसॉर्ट आणि वैशिष्ट्ये

• महाबळेश्वर, जि. सातारा - थंड हवेचे ठिकाण, निसर्गरम्य ठिकाण

• माथेरान, जि.रायगड - हिल स्टेशन, थंड हवेचे ठिकाण

• पानशेत, जि. पुणे - व्हॅली रिसॉर्ट, पानशेत धरण, जलतरण तलाव,

• माळशेज घाट, जि. ठाणे - उत्तुंग डोंगररांग, पावसाळी पर्यटनस्थळ, निसर्गरम्य धबधबे

• लोणावळा-कार्ला, जि. पुणे - वॉटर पार्क, बोटिंग

• कोयनानगर, जि. सातारा- कोयना धरण, जंगल सफारी

• भीमाशंकर, जि. पुणे - ज्योतिर्लिंग देवस्थान, अभयारण्य

‘एमटीडीसी’च्या रिसॉर्टसाठी ऑनलाइन बुकिंगची सुविधा आहे. सर्व रिसॉर्ट हे निसर्गरम्य ठिकाणी असून, तुलनेने दर कमी आहेत. सुरक्षितता आणि स्वच्छता यावर अधिक लक्ष दिले जाते. तसेच, १५ ते २० पेक्षा अधिक खोल्यांचे बुकिंग केल्यास २० टक्के सवलत देण्यात येत आहे. त्यामुळे पर्यटकांचा ‘एमटीडीसी’च्या रिसॉर्टकडे कल अधिक आहे.

- दीपक हरणे, प्रादेशिक अधिकारी, पुणे विभाग, ‘एमटीडीसी’