Pune : भोरवाडी मंचर भागात वाहतूक कोंडीचा फटका, महिला व लहान मुलांचे हाल. पोलीसही हातबल

मंचर : खेड ते सिन्नर बाह्यवळण रस्त्यावरून पुण्याहून नाशिकला जाणारी वाहतूक सुरू होती. पुण्याकडे जाणारी वाहतूक मंचर शहरातून जुने पुणे- नाशिक रस्त्याने सुरू ठेवली होती. पण पुण्याकडे जाणारी अनेक वाहने बाह्य वळण रस्त्याने गेल्यामुळे तेथेही वाहतूक कोंडी झाली. या वाहतूक कोंडीचा सर्वाधिक फटका भोरवाडी-गायमुख (ता.आंबेगाव) येथे बसला. त्यामुळे तब्बल दीड ते तीन किलोमीटर अंतरावर मंचर शहरापर्यंत वाहतूक कोंडी झाली होती.

दिवाळीनिमित्त वाहतूक कोंडी होऊ नये म्हणून मंचर पोलिसांनी व प्रशासनाने खेड ते सिन्नर या बाह्यवळण रस्त्याने एकेरी मार्गाने नाशिक बाजूला जाणारी वाहतूक वळवण्यात आली होती. नाशिकहून पुण्याला जाणारी वाहतूक जुन्या पुणे नाशिक रस्त्याने मंचर शहरातून जात होती. दिवाळी सणात या भागात कोठेही वाहतूकुंडीचा फटका बसला नाही. पण शनिवार (ता 29)पासून अनेक वाहनचालक पुण्याला जाताना मंचर शहरा ऐवजी बाह्यवळण रस्त्याने जात होते. त्यामुळे भोरवाडी-गायमुख ( तालुका आंबेगाव )जवळ वाहतूक कोंडी गेले दोन ते तीन दिवस सतत सुरू आहे.

शासकीय कार्यालय सोमवारपासून सुरू होणार आहेत. तसेच अनेक जण सुट्टीवरून माघारी येजा करतात. त्यामुळे रस्त्यावरून ये जा करणाऱ्या वाहनांचे संकेत तीन ते चार पटीने वाढ झाली. सध्या तीस ते पस्तीस हजार वाहने या रस्त्यावरून ये जा करतात. असे पोलिसांकडून सांगण्यात आले. वाहतूक पोलीस हतबल झाले होते. प्रवास करणारे जेष्ठ नागरिक , महिला व लहान मुलांचे अतोनात हाल झाले. तास ते दीड तास अनेक वाहने वाहतूक कोंडीत सापडली होती असे सेवानिवृत्त प्राचार्य डॉ.पांडुरंग गायकवाड यांनी सांगितले .

"वाहनचालकांनी पुण्याला जाताना बाह्य वळण रस्त्या ऐवजी मंचर शहरातून जावे "असे आव्हान मंचर पोलीस ठाण्याचे वाहतूक विभागाचे पोलीस नाईक मंगेश लोखंडे यांनी केले आहे.

भोरवाडी- गायमुख ( ता.आंबेगाव): पुणे- नाशिक जुन्या रस्त्यावर झालेली वाहतूक कोंडी