Pune : भुयारी मार्गातील समस्यांचा वाचला नागरिकांनी पाढा

उंड्री : हडपसरमधून बारा वाड्या-वस्त्यांना जोडणाऱ्या पुणे-मिरज लोहमार्गावरील सय्यदनगर आणि काळेबोराटेनगर रेल्वे गेट क्र.७ आणि ८ बंद केल्याने स्थानिक नागरिकांबरोबर वाहनचालकांना दिशादर्शक फलक आणि रात्रीच्या वेळी पथदिवे नसल्याने अडचणींचा सामना करावा लागत आहे. काळेबोराटेनगर आणि ससाणेनगर येथील भुयारी मार्गावर पथदिवे आणि दिशादर्शक फलक लावावेत, अशी मागणी वाहनचालकांकडून केली जात आहे.

काळेबोराटेनगर येथील भुयारी मार्गातून रवी पार्कच्या पाठीमागील रस्त्याचे काम मागिल अनेक वर्षांपासून रखडले आहे. हांडेवाडी रस्त्याकडून वागजाई मंदिरापासून रवी पार्क सोसायटीच्या बाजूने असलेल्या ओढ्यावर पुल टाकला असून, अवघा काही मीटरचा लांबीचा रखडल्यामुळे वाहनचालकांना सोसायटीला वळसा घालून ये-जा करावी लागत आहे, प्रा. धर्मराज म्हेत्रे, अमोल बोराटे, संकेत डांगमाळी, योगेश न्हावले, नारायण भोंगळे, नितीन सातव, स्कूल बसचालक शंकर मिसेकर यांनी सांगितले.

सय्यदनगर रेल्वेगेटपासून महंमदवाडी-हांडेवाडी रस्त्याची वारंवार खोदाई केली जाते. मात्र, त्यानंतर दुरुस्ती करण्याकडे सोयीस्कर दुर्लक्ष केले जात आहे. हांडेवाडी रस्त्यावर चिंतामणीनगर येथून रवी पार्ककडे जाण्यासाठीच्या रस्त्याला नामफलक लावावा, तसेच पुढे रेल्वेगेट बंद आहे, या रस्त्याचा वापर करावा, अशी सूचना लावण्याची गरज आहे, अशी मागणी निकिता झांबरे, तृप्ती टिळेकर, मृणाल हांडे, वृषाली वाडकर यांनी केली आहे.

काळेबोराटेनगर आणि ससाणेनगर भुयारी मार्गावर अधारात लुटमारीच्या वारंवार घटना घडत आहेत. महिला-मुलींची कुचंबना होत आहे. दिशादर्शक फलक नसल्याने नवख्याची वाहनचालकांची फसगत होत असा एक ना अनेक तक्रारींचा पाढा नागरिकांनी वाचला. पालिका प्रशासनाने दोन्ही भुयारी मार्गावर पथदिवे बसावेत.

- कल्पना हांडे, हांडेवाडी

हडपसर क्षेत्रीय कार्यालयातील महापालिका सहायक आयुक्त प्रसाद काटकर म्हणाले की, काळेबोराटेनगर येथील रवीपार्क सोसायटीशेजारील रस्त्याची पाहणी करून तातडीने उपाययोजना केली जाईल. भुयारी मार्गावर पथदिवे आणि दिशादर्शक फलक लावण्यासाठीची उपाययोजना केली जाईल.