Special Security Helpline : पुणे विद्यापीठात ‘सुरक्षा हेल्पलाइन’ कार्यान्वित

पुणे - सावित्रीबाई फुले पुणे विद्यापीठात गेल्या काही महिन्यांपासून घडलेल्या घटनांची दखल घेत आता अखेर विद्यापीठाला जाग आली आहे. विद्यापीठाने विद्यार्थी, प्राध्यापक, कर्मचारी आणि अभ्यागत यांच्या सुरक्षेसाठी ‘विशेष सुरक्षा हेल्पलाइन’ सुरू केली आहे. हेल्पलाइनद्वारे विद्यापीठ परिसरातील सुरक्षेसंबंधित तक्रारी आणि आपत्कालीन परिस्थितीवर तत्काळ उपाययोजना केली जाणार आहे.

विद्यापीठामध्ये मुलांच्या वसतिगृहात अंमली पदार्थ, तर मुलींच्या वसतिगृहात दारूच्या बाटल्या सापडण्याचे प्रकार घडले आहेत. एवढंच नव्हे तर विद्यापीठाच्या आवारात मंगळवारी एका विकृत व्यक्तीने काही विद्यार्थिनींसमोर गैरप्रकार करण्याचा प्रयत्न केल्याची घटना घडली.

या पार्श्वभूमीवर उशिरा का होईना जागे झालेल्या विद्यापीठाने सुरक्षेच्या दृष्टीने चोवीस तास सुरू असणारी हेल्पलाइन कार्यान्वित केली आहे. सुरक्षा संबंधित तक्रारी, आपत्कालीन परिस्थिती, कोणतीही घटना तत्काळ आणि विश्वासार्ह पद्धतीने नोंदविली जाणे, हा या हेल्पलाइन सुरू करण्यामागील उद्देश आहे.

विद्यापीठ आवारातील वातावरण सुरक्षित आणि संरक्षित राहावे, यासाठी ही हेल्पलाइन सुरू करण्यात आली आहे. सुरक्षेशी संबंधित कोणत्याही समस्यांचे त्वरित आणि प्रभावीपणे निराकरण होण्यासाठी मदत म्हणून, हे पाऊल विद्यापीठाने हे पाऊल उचलले आहे. हा हेल्पलाइन क्रमांक विद्यार्थी, प्राध्यापक, कर्मचारी यांनी आपल्याकडे नोंदवून ठेवावा, असे आवाहनही विद्यापीठ प्रशासनाने केले आहे.

अशी आहे हेल्पलाइन -

विद्यापीठाचा सुरक्षा हेल्पलाइन नंबर: ०२०-४८५५३३८३

हेल्पलाइनचा वापर यासाठी करा -

- संशयास्पद हालचाली नोंदविणे

- आपत्कालीन परिस्थितीत त्वरित मदत मिळविणे

- सुरक्षा आणि सुरक्षिततेशी संबंधित तक्रारी

- छळ किंवा त्रासदायक परिस्थितीत साहाय्य मिळविणे

- अन्य सुरक्षा-संबंधित समस्यांसाठी

अशी असेल ‘हेल्पलाइन’ची कार्यपद्धती -

- सुरक्षा-संबंधी तक्रार नोंदवण्यासाठी हेल्पलाइन नंबरवर संपर्क साधा.

- प्रशिक्षित सुरक्षा कर्मचारी परिस्थितीचे मूल्यांकन करून आवश्यक ती कार्यवाही करतील.

- विद्यापीठ सुरक्षा पथक गरजेनुसार स्थानिक कायदा अंमलबजावणी संस्थांसोबत समन्वय साधेल.

- सर्व तक्रारी गोपनियतेने आणि तातडीने हाताळल्या जातील.