Pune : विद्यापीठाच्या सिनेट निवडणूकीसाठी अण्णासाहेब मगर केंद्रावर २५.९४ टक्के मतदान

हडपसर : सावित्रीबाई फुले पुणे विद्यापीठाच्या सिनेट निवडणूकीसाठी येथील अण्णासाहेब मगर मतदान केंद्रावर २५.९४ टक्के पदवीधर मतदारांनी शांततेत मतदानाचा हक्क बजावला. ही टक्केवारी लक्षात घेता मतदारांमध्ये निरुत्साह असल्याचे दिसून आले. मतदानकक्षात पसंतीक्रमांकानुसार मतदान करताना प्रक्रियेला उशीर लागत असल्याने दिवसभर केंद्रासमोर रांग दिसत होती.

या मतदान केंद्रावर दोन मतदान कक्ष होते. एकूण १८५० मतदारांच्या मतदानाची व्यवस्था येथे करण्यात आली होती. मतदान प्रक्रियेला वेळ लागत असल्याने दिवसभर या केंद्रावर रांग दिसत होती. अनेक मतदार त्यामुळे माघारी गेले. निवडणूक रिंगणात असलेल्या उमेदवारांचे कार्यकर्ते, पक्षाचा पाठिंबा असलेल्या पक्षाचे पदाधिकारी व प्रमुख कार्यकर्ते दिवसभर केंद्राबाहेर थांबून मतदारांना मतदानासाठी येण्याबाबत प्रयत्न करीत होते. एवढे प्रयत्न करूनही केवळ ४८० मतदारांनीच मतदानाचा हक्क बजावला.

"येथील केंद्रावरील १८५० पैकी ४८० मतदारांनी मतदान केले. त्यातील "अ' खोलीत ९१७ पैकी २५३ तर, "ब' खोलीत ९३३ पैकी २२७ मतदारांनी मतदान केले,' अशी माहिती केंद्राध्यक्ष डॉ. प्रशांत मुळे यांनी दिली.