पुणे: विश्वात्मक संत साहित्य संमेलन हे ४ ते ६ एप्रिल कोल्हापूरत होणार

पुणे: विश्वात्मक संत साहित्य परिषद, पुणे आणि अमरवाणी इव्हेंट्स फाउंडेशनच्या वतनी पहिले विश्वात्मक संत साहित्य संमेलन आयोजित करण्यात आले आहे. हे संमेलन येत्या ४ ते ६ एप्रिल २०२२ या कालावधीत कोल्हापूर येथे होणार आहे. भारत सरकारच्या कंपनी लवादाचे सदस्य ज्येष्ठ कीर्तनकार ह.भ.प. डॉ. मदन महाराज गोसावी हे संमेलनाचे अध्यक्ष तर संत साहित्याचे अभ्यासक डॉ. सदानंद मोरे हे स्वागताध्यक्ष आहेत. अशी माहिती प्रा. डॉ. प्रकाश खांडगे यांनी शनिवारी पत्रकार परिषदेत दिली.

या प्रसंगी डॉ. मदन महाराज गोसावी, प्रा. डॉ. सदानंद मोरे, डॉ. रंगनाथ नाईकडे, मोहन तिवारी, शिरीष चिटणीस आदी उपस्थित होते. संमेलनाविषयी विस्तृत माहिती देताना डॉ. खांडगे म्हणाले, ‘‘संमेलनाचे उद्घाटन ५ एप्रिल रोजी सकाळी अकरा वाजता कोल्हापुरातील महासैनिक दरबार हॉलमध्ये राज्यपाल भगतसिंह कोशियारी यांच्या हस्ते होणार आहे. उद्घाटन समारंभास प्रमुख पाहुणे म्हणून पालकमंत्री सतेज पाटील, ग्रामविकास मंत्री हसन मुश्रीफ, उच्च व तंत्र शिक्षण मंत्री उदय सामंत, सांस्कृतिक कार्य राज्यमंत्री राजेंद्र पाटील यड्रावकर, ज्येष्ठ कवयित्री डॉ. अरुणा ढेरे आदी उपस्थित राहणार आहेत. संमेलनामध्ये कीर्तन, भजन, भारूड व भक्तिसंगीताचा कार्यक्रमांबरोबर विविध विषयांवर परिसंवाद, चर्चासत्रांचे आयोजन करण्यात आले आहे. तसेच ग्रंथरूपी स्मरणिकेचे प्रकाशन आणि पुरस्कार वितरण पार पडणार आहे.’’

संत साहित्याच्या अभ्यासकांनी, विचारवंतांनी आणि सर्व नागरिकांनी या संमेलनाचा लाभ घ्यावा, असे आवाहन फाउंडेशनचे संचालक रवी पाटील, संचालक मोहन गोस्वामी (तिवारी) आणि विश्वात्मक संत साहित्य परिषदेतर्फे करण्यात आले.