पांगारे घाटातील डोंगर वणव्यात होरपळले

परिंचे : पांगारे ( ता.पुरंदर) घाटात खाजगी क्षेत्रात लागलेल्या वणव्यात डोंगर होरपळून निघाले आहेत. जैवविविधतेचे सह जंगलाचे मोठ्या प्रमाणात नुकसान झाले असून वणवा लावणाऱ्या अज्ञात व्यक्ती विरोधात गुन्हा नोंदविण्यात आला असल्याचे पुरंदर तालुका वन परिक्षेत्र अधिकारी विशाल चव्हाण यांनी सांगितले आहे.बुधवारी व गुरुवारी (दि.२८) रोजी सकाळी पांगारे घाटातील खाजगी क्षेत्रातील जमिनीवर अज्ञात व्यक्तीने आग लावल्याने ती आग घाटातील वनक्षेत्रात लागली आहे. सकाळी ११ वाजता या आगीने रौद्र रूप धारण केले होते.वन विभागाच्या कर्मचाऱ्यांनी प्रसंगावधान दाखवून वन क्षेत्र आगीपासून वाचवण्यासाठी शर्थीचे प्रयत्न केले. परिसराची पाहणी केली असता पांगारे,हरगुडे, सटलवाडी, मांढर, पाणवडी या परिसरातील डोंगर मोठ्या प्रमाणात वणव्यामुळे होरपळून निघाले आहेत.

पांगारे घाट परिसरात रानडुक्कर, हरिण, लाडगे,ससे, बिबट्या आदी प्राणी तसेच मोर व वेगवेगळ्या प्रकारचे पक्षी मोठ्या प्रमाणात आढळतात वणव्या मुळे या प्राण्यांच्या जीवाला धोका निर्माण झाला आहे. वन विभागाच्या वतीने अनेक ठिकाणी आगी पासून वन क्षेत्र संरक्षण करण्यासाठी जाळ रेषा काढल्या आहेत. परिसरातील शेतकरी खाजगी क्षेत्रात आग लावत असून त्याचा फटका वन विभागाला बसत असल्याचे वनरक्षक गणेश तांबे यांनी सांगितले आहे.वन विभागाच्या वतीने डोंगराच्या शेजारी असलेल्या गावांमध्ये वणव्या विषयी जागृती करण्यात येत वणवा लागू नये यासाठी घेण्यात येणारी काळजी, वणव्याचे दुष्परिणाम या विषयावर माहिती देण्यात आली असल्याचे वन रक्षक परमेश्वर वाघमारे यांनी सांगितले आहे.

नागरिकांनी मालकी क्षेत्रात वणवा लावू नये. सदरील क्षेत्रातील वणवा फॉरेस्ट मधे येउन वनातील वनउपज वन्यजीव , वृक्ष , पाणी, जमिनिचा पोत यांचा रहास होत होतो. वन वणवा लावणे है दंडनीय गुन्हा असून भारतीय वैन अधिनियम १९२७ चे कलम २६(१) ब आणि क अन्वय पाच हजार रुपये दंड / नुकसानी किंमत व दोन वर्ष कारावासाची शिक्षा आहे. वणवा विझविन्यासाठी नागरिकांनी मदत करणे कायदेशीर कर्त्यव्य पुरंदर वन परिक्षेत्र अधिकारी विशाल चव्हाण यांनी सांगितले आहे.