पुण्यात पुढील 2 दिवस सरीवर सरी

पुणे : शहर आणि परिसरात पुढील दोन दिवस ढगांच्या गडगडाटासह पावसाच्या सरींची शक्यता हवामान खात्याने रविवारी वर्तविली आहे. त्यामुळे पुणेकरांनो कामाव्यतिरिक्त घराच्या बाहेर पडू नका.

अरबी समुद्रात निर्माण झालेल्या तौक्ते चक्रीवादळामुळे पुण्याच्या परिसरात मोठ्या प्रमाणात बाष्प जमा झाले होते. त्यामुळे गेल्या आठवड्यात शहरात पावसाच्या दमदार सरी पडल्या. त्या प्रभावातून पुण्याचे वातावरण पूर्ववत होत असताना आता पुन्हा पावसाच्या सरी पडण्याची शक्यता हवामान खात्याने वर्तविली आहे.

शहरात रविवारी सकाळपासून दुपारपर्यंत आकाश अंशतः ढगाळ होते. त्याचबरोबर उन्हाचा चटकाही जाणवत होता. कमाल तापमानाचा पारा ३५.३ अंश सेल्सिअस नोंदला गेला. दुपारनंतर वातावरणात वेगाने बदल झाला. आकाशात ढगांची गर्दी झाली आणि संध्याकाळी पाच वाजण्याच्या सुमारास शहराच्या पेठांसह सिंहगड रस्ता, सातारा रस्ता, कोथरूड, कात्रज, सहकारनगर, धनकवडी येथे पावसाच्या हलक्या सरी पडल्या. दुपारपर्यंत वाढलेल्या उष्णतेमुळे स्थानिक परिणाम होऊन हा पाऊस पडल्याचे हवामान खात्यातील अधिकाऱ्यांनी सांगितले.

शहर आणि परिसरात पुढील दोन दिवसांमध्ये ढगांच्या गडगडटासह पाऊस पडेल, असेही खात्यातर्फे स्पष्ट करण्यात आले आहे. किमान तापमानाचा पारा ३५ अंश सेल्सिअसच्या दरम्यान नोंदला जाईल.

मध्य महाराष्ट्रात तीन दिवस पाऊस

मध्य महाराष्ट्रातील तुरळक ठिकाणी पाऊस पडण्याची शक्यता वर्तविण्यात आली आहे. ढगांच्या गडगडाटासह पावसाच्या सरी पडतील. कोकणातही पावसाचा अंदाज आहे. मराठवाडा आणि विदर्भात हवामान कोरडे राहील, असे खात्याकडून सांगण्यात आले.