पुणे शहरात गुरुवारपर्यंत पावसाचा मुक्काम

पुणे - बंगालच्या उपसागरातील हवेचे कमी दाबाचे क्षेत्र क्षीण होत असले, तरी पुण्यासह राज्यात मॉन्सून अजूनही सक्रिय आहे. आजही शहर व परिसरात सकाळपासूनच हलक्या ते मध्यम स्वरूपाच्या सरींनी हजेरी लावली. गुरुवार (ता.१५) पर्यंत पुण्यासह राज्यभरात आकाश प्रामुख्याने ढगाळ आणि दुपारनंतर एक-दोन जोरदार सरींची हवामान खात्याने वर्तविली आहे.

कोकण किनाऱ्यावरील चक्राकार वारे, अरबी समुद्रातून येणारी बाष्पयुक्त ढग आणि बंगालच्या उपसागरातील कमी दाबाचे क्षेत्र यामुळं राज्यात मॉन्सूनच्या पावसाने धुमाकूळ घातला आहे. दिवसभर आकाश प्रामुख्याने ढगाळ आणि दुपारनंतर हलक्या ते मध्यम स्वरूपाच्या सरी कोसळत आहे.

पुणे व परिसरात मंगळवारी सकाळापासूनच हलक्या सरींना सुरवात झाली होती, काही ठिकाणी मध्यम स्वरूपाच्या पावसाची नोंद झाली. सततच्या पावसामुळे झाडांच्या फांद्या तुटणे किंवा उन्मळून पडणे, रस्ते निसरडे होणे, रस्त्यावर खड्डे पडणे आणि सखल भागात पाणी साचण्याच्या घटना घडू शकतात अशी शक्यता हवामान खात्याने वर्तवली आहे. पुढील दोन दिवस कोकण, घाटमाथा आणि दक्षिण महाराष्ट्रात हलक्या ते मध्यम रूपाच्या पावसाची शक्यता आहे. त्यानंतर काही अंशी पावसाची तीव्रता कमी होईल असे संकेत आहे. याच काळात विदर्भ आणि मराठवाड्यात तुरळक ठिकाणी पावसाची शक्यता कायम आहे.

पुणे शहरातील पाऊस (रात्री ९ पर्यंत, मिमी)

• शिवाजीनगर : ३.१

• लोहगाव : २.६

• चिंचवड : १२.५