राजाभाऊ गुडदे फाउंडेशनतर्फे ब्लँकेट वाटप अभियान

बालेवाडी, ता. १ ः बाणेर येथील राजाभाऊ गुडदे फाउंडेशनतर्फे वाढत्या थंडीच्या पार्श्वभूमीवर गरजू व निराधार नागरिकांना दिलासा मिळावा या उद्देशाने ‘मायेची ऊब’ या नावाने ब्लँकेट वाटप अभियान राबविण्यात आले. हे अभियान २० डिसेंबर ते ३० डिसेंबर या कालावधीत सामाजिक बांधिलकी जपत यशस्वीरीत्या पार पडले.
या उपक्रमांतर्गत फाउंडेशनच्या कार्यकर्त्यांनी शहर व परिसरातील विविध भागांमध्ये प्रत्यक्ष भेटी देत गरजू नागरिकांना ब्लँकेट्स वितरित केले. रस्त्यावर वास्तव्यास असलेले नागरिक, वृद्ध व्यक्ती, मजूर तसेच आर्थिकदृष्ट्या दुर्बल घटकांना या उपक्रमाचा विशेष लाभ झाला.
ब्लँकेट वाटप करताना फाउंडेशनच्या सदस्यांनी गरजू नागरिकांशी संवाद साधत त्यांच्या अडचणी जाणून घेतल्या व माणुसकीच्या नात्याने मदतीचा हात पुढे केला. या उपक्रमामुळे थंडीच्या दिवसांत अनेकांना ऊब आणि दिलासा मिळाला. राजाभाऊ गुडदे फाउंडेशनतर्फे भविष्यातही अशा प्रकारचे सामाजिक उपक्रम सातत्याने राबवून समाजातील वंचित व गरजू घटकांसाठी कार्य करण्याचा निर्धार या वेळी व्यक्त करण्यात आला.