कासार अंबोलीच्या शाळेत कलाविष्कार सादर

पिरंगुट, ता. ३० : कासार अंबोली (ता. मुळशी) येथील मएसो राणी लक्ष्मीबाई मुलींची सैनिकी शाळेचे वार्षिक स्नेहसंमेलन निनाद २०२५ उत्साहात पार पडले. कार्यक्रमाचे प्रमुख पाहुणे म्हणून अभिनेत्री स्मिता शेवाळे, मएसो सोसायटीच्या नियामक मंडळ उपाध्यक्षा व शाला समितीच्या अध्यक्षा आनंदी पाटील, महामात्रा प्रा. चित्रा नगरकर, पालक शिक्षक संघ उपाध्यक्ष संदीप अमराळे, शाळेचे कमांडंट एविएन विंग कमांडर एम. यज्ञरामन, प्राचार्या ज्योती खिरीड, पर्यवेक्षक संदीप पवार आदी उपस्थित होते.
भारतातील थोर राण्या, योद्धा आणि कर्तृत्ववान महिला या विषयावर आधारित स्नेहसंमेलनाची आंतरकुल स्पर्धा घेण्यात आली होती. राजमाता जिजाऊ, राणी लक्ष्मीबाई, राणी पद्मावती, राणी चेन्नमा, राणी दुर्गावती, डॉ. आनंदीबाई जोशी, सावित्रीबाई फुले, व्योमिका सिंग, सोफिया कुरेशी यांच्या जीवनपटाचे नृत्य, नाटिका याद्वारे सादरीकरण करण्यात आले. स्पर्धेचे परीक्षण अश्विनी पवार, प्राचार्या ज्योती खिरीड व अद्वैत जगधने यांनी केले.
प्रमुख अतिथींच्या हस्ते गुणवंत कॅडेटसचा रोख पारितोषिक व ट्रॅाफी देऊन सत्कार करण्यात आला. सूत्रसंचालन महेश कोतकर व अश्विनी मारणे यांनी केले. यावेळी थ्री डी प्रिंटर लॅबचे उद्‍घाटन आनंदी पाटील यांच्या हस्ते झाले. कार्यक्रमाचे आयोजन स्नेहसंमेलन कार्यवाह सुनीता शिंदे, सहकार्यवाह दीपाली आंबवणे, मंजिरी पाटील, वैशाली शिंदे, विद्यार्थिनी प्रतिनिधी कॅडेट श्रद्धा बडीगर, कॅडेट पद्मश्री पवार व सर्व शिक्षक शिक्षकेत्तर कर्मचारी व सैनिकी परिवाराने केले.