'सुपरस्प्रेडर' ची जागेवरच होणार रॅपिड अँटिजेन चाचणी | Sakal
sakal

बोलून बातमी शोधा

Rapid antigen testing
'सुपरस्प्रेडर' ची जागेवरच होणार रॅपिड अँटिजेन चाचणी

'सुपरस्प्रेडर' ची जागेवरच होणार रॅपिड अँटिजेन चाचणी

पुणे - शहरात कोरोना रुग्णांची (Corona Patients) संख्या दररोज वाढतच असल्याने बाधितांची संख्या रोखण्यासाठी ‘सुपरस्प्रेडर’ची (Superspreader) कोरोना तपासणी (Corona Testing) केली जाणार आहे. शहरातील पथारी व्यावसायिक, भाजी व फळ विक्रेते, हॉटेलचालक व कर्मचारी आणि व्यावसायिकांसह शासकीय कर्मचाऱ्यांचीही चाचणी करण्याचा निर्णय महापालिकेने (Municipal) घेतला आहे, अशी माहिती महापालिका आयुक्त विक्रमकुमार (Vikramkumar) यांनी गुरुवारी (ता. ६) दिली.

सुपरस्प्रेडर ठरू शकणाऱ्यांची जागेवरच रॅपिड अँटिजेन चाचणी करण्यात येणार आहे. त्यामुळे त्यांच्यापासून होणार कोरोनाचा प्रसार रोखण्यास मदत होणार आहे. ‘‘कोरोना रुग्णांची संख्या सध्या मोठ्या प्रमाणात वाढत आहे. त्यामुळे अधिक दक्ष राहण्याची गरज आहे. ज्या ठिकाणी नागरिकांची गर्दी होताना दिसते, अशा ठिकाणी रॅपिड अँटिजेन चाचणी करण्यात येर्इल. त्यानुसार विविध प्रकारचे विक्रेते, पथारीवाले, टपरीचालक, हॉटेल व्यावसायिक आदींची रॅपिड अँटिजेन चाचणी केली जाणार आहे. त्यासाठी क्षेत्रीय कार्यालय स्तरावर कर्मचाऱ्यांची पथके तयार करण्यात आली आहेत,’’ असे विक्रमकुमार यांनी सांगितले. शहरात वाढत असलेल्या कोरोनाच्या प्रसाराच्या पार्श्वभूमीवर विक्रमकुमार यांनी स्थितीचा आढावा घेतला. त्यानुसार हा निर्णय घेण्यात आला आहे.

कोरोना प्रतिबंधक नियमांचे काटेकोर पालन करण्याचे आदेश -

मास्कविना फिरणारे नागरिक, थुंकणारे नागरिक तसेच अन्य नियमांचे पालन न करणाऱ्यांवर कडक कारवाई केली जाणार आहे. कोरोना प्रतिबंधक नियमांचे काटेकोर पालन करण्याचे आदेश प्रशासनाला देण्यात आले आहेत. त्यासाठी क्षेत्रीय कार्यालय स्तरावर तसेच महापालिका भवनमध्येही कोरोना कंट्रोल रूम सुरू करण्यात येणार आहे, असे विक्रमकुमार म्हणाले.

हेही वाचा: पुण्याचा नियोजीत आंतरराष्ट्रीय विमानतळ अधांतरीच !

पूर्वीच्या नियमावलीनुसारच प्रतिबंधित क्षेत्र जाहीर होणार -

कोरोनासंदर्भात यापूर्वी लागू केलेल्या नियमावलीनुसारच प्रतिबंधित क्षेत्र जाहीर केली जाणार आहेत. ज्या इमारतीत पाचपेक्षा अधिक कोरोनाबाधित रुग्ण आढळून येतील ती इमारत सूक्ष्म प्रतिबंधित क्षेत्र म्हणून घोषित करण्यात येत आहे, असेही विक्रमकुमार यांनी सांगितले. दरम्यान, महापालिकेतही रॅपिड अँटिजेन चाचण्या केल्या जात असून त्यात एक कर्मचारी बाधित आढळला आहे. पालिकेच्या सर्व विभागातील कर्मचाऱ्यांची चाचणी केली जाणार आहे.

शहरातील कोरोना रुग्णांची संख्या वाढत असली तरी रुग्णालयात दाखल होणाऱ्यांचे प्रमाण खूप कमी आहे. सध्या एकूण बांधीत रुग्णांपैकी केवळ दोन टक्के रुग्ण रुग्णालयात उपचार घेत आहे. त्यातही ऑक्सिजनची गरज असलेल्या रुग्णांची संख्या आणखी कमी आहे. तर उर्वरित रुग्ण घरीच विलगीकरणात आहे. अद्याप लसीकरण पूर्ण न झालेल्या नागरिकांचे लसीकरण वेगाने पूर्ण केले जाणार आहे. त्यामुळे नागरिकांनी घाबरून न जाता काळजी घ्यावी.

- विक्रमकुमार, पालिका आयुक्त

Read Latest Marathi News Headlines of Maharashtra, Live Marathi News of Mumbai, Pune, Politics, Finance, Entertainment, Sports, Jobs, Lifestyle at Sakal. To Get Updates on Mobile, Download the Sakal Mobile App for Android & iOS.
सकाळ आता सर्व सोशल मीडिया प्लॅटफॉर्मवर. ताज्या घडामोडींसाठी टेलिग्राम, फेसबुक, ट्विटर, शेअर चॅट आणि इन्स्टाग्रामवर आम्हाला फॉलो करा तसेच, आमच्या YouTube Channel आजच Subscribe करा..
loading image
go to top